काठमाडौं । आगामी भदौ १९ गतेदेखि प्रदर्शनमा आउने फिल्म ‘ककाकिकी’को शीर्ष गीत सार्वजनिक गरिएको छ । निर्माण टिमले बुधबार ओएसआर डिजिटलको युट्युब च्यानलमार्फत गीत सार्वजनिक गरेको हो ।
गीतमा अर्जुन सापकोटा र मेलिना राईको स्वर रहेको छ । गीतमा अर्जुन सापकोटाकै संगीत तथा हुकलाइन रहेको छ भने शब्द सन्तोष सापकोटाले लेखेका हुन् । सार्वजनिक गीतले गाउँघरको उत्सव, रमाइलो र सामूहिक सेलिब्रेसनको माहोललाई प्रस्तुत गरेको छ ।
गीतको भिडियोमा फिल्मका कलाकारहरू गौरी मल्ल, तृप्ति नाडकर, रेखा थापा, महेश त्रिपाठी, प्रकाश घिमिरे, खड्गबहादुर पुनमगर लगायतलाई देख्न सकिन्छ । भिडियोमा गायक अर्जुन सापकोटासहित पवित्रा शाकी (मिस पवि), सजिना खनाल र निश्चल खड्काले पनि नृत्य गरेका छन् । गीतको कोरियोग्राफी मिग्मा डि लेप्चाले गरेका हुन् ।
जर्सिङ पौवामा छायांकन गरिएको गीतको भिडियो गाउँमा भइरहेको सेलिब्रेसन (उत्सव)को दृश्यमा तयार पारिएको हो । फिल्मका निर्देशक बिक्की अगरवालका अनुसार गीतले फिल्मको कथाको ग्रामीण परिवेश र उत्सवमय वातावरणलाई प्रतिनिधित्व गर्छ ।
फिल्ममा दीया मास्के, शिशिर वाङ्देल, सुवास गजुरेल, रेअर राई, पवन खतिवडा, माओत्से गुरुङ, मनोज गजुरेल, मुकुन्द मैनाली, रामबाबु रेग्मी, सीडी विजय अधिकारी, सरोज भण्डारी, सृजना श्रेष्ठ, विश्वास तिमल्सिना, एलिसा भोग, सुवर्ण थापा र कमल देवकोटा लगायतका कलाकारको अभिनय रहेको छ ।
सुदिप बरालको छायांकन रहेको चलचित्रको पटकथा निर्देशक अगरवालसँगै सरोज भण्डारी र विकास अर्यालले लेखेका हुन् । फिल्मको निर्माता श्रद्धा प्रसाईं र सुमित्रा थापा हुन् । चलचित्रलाई सेभेन सिज इन्टरनेशनल फिल्मसले विश्वव्यापी रिलिज गर्दैछ ।
