काठमाडौं । फिल्म ‘गौँथली’ निर्माण टिमले ज्येष्ठ नागरिकलाई निःशुल्क फिल्म हेर्ने अफर ल्याएको छ । भदौ १० गतेदेखि भदौ २१ गतेसम्म ६० वर्षभन्दा माथिका नागरिकले ‘गौँथली’ निःशुल्क हेर्न पाउने छन् ।
यसका लागि खल्ती एपबाट यो टिकट काट्नु पर्नेछ । खल्तीमा आफूले काटेको पैसा फिर्ता आउनेछ । ‘पैसा रिफन्डका लागि नागरिकता र तस्बिर भने पठाउनु पर्नेछ,’ ‘गौँथली’ निर्देशक डा. कपिल रिजालले भने ।
‘खल्तीमार्फत गरिएको टिकट खरिदको कारोबार ‘ट्रान्जेक्सन’को स्क्रिनसट पेस गरिएको हुनुपर्ने । ‘गौँथली’को तस्बिर र पोस्टर पृष्ठभूमिमा रहने गरी खिचिएको प्रयोगकर्ताको फोटो पेस गरिएको हुनुपर्नेछ,’ निर्देशक रिजालले भने, ‘खरिदको कुल टिकट मूल्य बराबरको रकम सम्बन्धित प्रयोगकर्ताको खल्ती वालेटमा जम्मा हुनेछ ।’
यस अभियानलाई सहयोग पुर्याउन, खल्तीमा एक लाख रुपैयाँ मात्र अग्रिम रकम जम्मा गरिनेछ । जसबाट योग्य प्रयोगकर्ताहरूलाई रकम फिर्ता गरिनेछ ।
‘यो अग्रिम रकम नसकिँदासम्म वा अभियानको अवधि समाप्त नभएसम्म (जुन पहिले हुन्छ, त्यही समयसम्म) यसै रकमबाट फिर्ता प्रक्रिया अघि बढाइनेछ,” निर्माणपक्षले भनेको छ ।
अरूण क्षेत्री र सिम्रन खड्काको प्रमुख भूमिकामा अभिनय रहेको फिल्मले हालसम्म २५ करोड २२ लाख रुपैयाँ ग्रसकलेक्सन गरिसकेको छ । फिल्ममा मदनकृष्ण श्रेष्ठ, प्रकाश घिमिरे, लुनिभा तुलाधर, रवीन्द्र झा, सञ्जोग रसाइली, सीतादेवी तिमिल्सिना, लक्ष्मीनाथ तिमिल्सिनालगायत कलाकारहरूको पनि अभिनय छ ।
फिल्मका निर्माता कपिल रिजाल र सुमन गिरी हुन् ।
