काठमाडौं । आगामी असोज २४ गतेबाट रिलिज हुने फिल्म ‘छ माया छपक्कै’ को प्यारोडी प्रमोसनल गीत ‘बीच्च बीच्चमा’ सार्वजनिक भएको छ । गायक दुर्गेश थापाको स्वरमा रहेको गीतमा दुर्गेश स्वयंको शब्द, संगीत र स्वर छ । गीतमा दुर्गेशले फिल्मकै कलाकारलाई प्रस्तुत गरेर रमाइलो किसिमले गीत गाएका छन् ।
भक्तपुरको राधेराधे चोकमा रहेको अग्लो भवनमा खिचिएको गीतको भिडियोमा गायक दुर्गेशसहित कलाकारहरु दीपकराज गिरी, जितु नेपाल, केदार घिमिरे, केकी अधिकारी, सुपुष्पा भट्ट र दीपाश्री निरौला फिचर्ड छन् ।
दीपेन्द्र लामा निर्दे्शित फिल्म ‘छ माया छपक्कै’ मा दीपकराज र केकी, जितु नेपाल र सुपुष्पा भट्टको प्रेमलाई देखाइनेछ । फिल्ममा अनुराग कुँवर, प्रकाश घिमिरे, रमा थपलिया, विष्णु सापकोटालगायतका कलाकारहरुको पनि अभिनय छ । फिल्ममा रोहित अधिकारी निर्माता तथा जितु नेपाल र केदारप्रसाद घिमिरे कार्यकारी निर्माता छन् ।
