काठमाडौं । आगामी चैत २८ गते रिलिज हुने फिल्म ‘प्रेमगीत ३’को पहिलो अफिसियल फष्टलुक सार्वजनिक भएको छ । फिल्मका निर्माता तथा निर्देशक सन्तोष सेनले फेसबुकमार्फत फिल्मका कलाकार शिव श्रेष्ठको रिसाहा रुप समेटिएको फष्टलुक सार्वजनिक गरेका हुन् । फिल्मको हाल कीर्तिपुरमा सेट बनाएर धमाधम छायांकन भइरहेको छ ।
छेतेन गुरुङ र सन्तोष सेनको संयुक्त निर्देशन रहेको फिल्मको बाँकी दृश्य छायांकनका लागि सुटिङ युनिट मुस्ताङ जाँदैछ । फिल्मको सार्वजनिक पोस्टरमा अभिनेता शिवलाई क्रोधित अवतारमा देखाइएको छ । फिल्ममा उनी राजा योद्धावीरको भूमिकामा छन् ।
करिव २ सय वर्ष पुरानो कथा देखाइने फिल्ममा प्रदीप खड्का र क्रिष्टिना गुरुङ शिर्ष भूमिकामा छन् । फिल्मको अघिल्ला दुई संस्करण सफल फिल्म हुन् । निर्देशक गुरुङ र मन्दीप गौतमले लेखेको फिल्ममा सुनिल थापा, सन्तोष सेन, माओत्से गुरुङ, मनिष राउत, पुस्कर कार्की, प्रेम पुरी, लक्ष्मी वर्देवा, अनुभव रेग्मी, योगिशा खत्री, सम्वृद्धि शाही ठकुरीलगायतका कलाकारको अभिनय छ ।
आशुसेन फिल्मस् प्रोडक्सनको व्यानरमा बनिरहेको फिल्ममा कल्याण सिंह र एलिश कार्कीको संगीत, राजेश श्रेष्ठको छायांकन, हिमाल केसीको द्वन्द्व, कविराज गहतराजको कोरियोग्राफी र बनिश शाह तथा भुपेन्द्र अधिकारीको सम्पादन छ ।
