काठमाडौं । कोजु इन्टरटेन्टमेनको ब्यानरमा हरि लामाको प्रस्तुति र तिर्थ राम कोजु र हरि थापाको निर्माणमा तयार भएको फिल्म ‘गोर्खे’ पोस्टर सार्वजनिक भएको छ । सार्वजनिक दुई पोस्टरमा अभिनेता रविन्द्र प्रताप सेन फिचर्ड छन् । एउटा पोस्टरमा सैनिक पोशाकमा रविन्द्र हातमा बन्दुक बोकेर आक्रोशित मुद्रामा र अर्कोमा पोस्टरमा हातमा खुकुरी बोकेर दौडिरहेको देखाइएको छ ।
यसअघि फिल्मको ‘सिन्के अचार’ र ‘गाउँभरी हल्ला भो’बोलको गीत सार्वजनिक भइसकेको छ । यही चैत्र २८ गते रिलिज हुने तयारी रहेको फिल्म कोरोना भाइरसको प्रकोपका कारण सरेको छ । पाल्पा, बर्दघाट, धम्पुस, पोखरा र काठमाडौलगायतका स्थानमा छायांकन गरिएको फिल्ममा किम्मत गौतमको निर्देशन छ । निर्देशक गौतमका अनुसार फिल्मले गोर्खे बन्ने सपना बोकेका ५ युवाहरुको कथालाई फिल्ममा देखाइनेछ ।
फिल्ममा रबिन्द्र प्रताप सेन, अन्जली अधिकारी, अर्जुन गुरुङ्ग, आश्मी लामा, आश्मी श्रेष्ठ, एन्जेल श्रेष्ठ, बालदिप राईलगायतका कलाकारको अभिनय छ । सौरभ लामा र निरज कँडेलको छायांकन रहेको फिल्ममा काजी लिम्बुको कथा छ । करिब ४५ दिनमा छायांकन सकिएको फिल्ममा छिन्दु पाख्रिन र हरि लम्सालको संगीत र मित्र डी गुरुङको सम्पादन छ ।
