मुम्बई(एजेन्सी) । बलिउड अभिनेता सोनू सूदले आफ्नो मुम्बईको जुहुस्थित होटल चिकित्सक तथा मेडिकल कामदार लाई बस्नका लागि दिएका छन् । हालैको एक अन्तरवार्तामा उनले आफ्नो ज्यानको बाजी राखेर कोरोना संक्रमितको उपचारमा संलग्न चिकित्सक तथा कामदारलाई होटलको कोठा दिएको खुलाएका हुन् ।
‘मैले सुने अनुसार हाम्रो ज्यान बचाउनका लागि आफ्नो ज्यानको बाजी थाप्ने चिकित्सक र कामदारहरुलाई उनीहरु बस्ने घरमा जान दिइएको छैन । उनीहरुमाथि यो खराब व्यवहार भयो । त्यसकारण मैले उनीहरुलाई सहयोग गर्ने निर्णय लिएको हुँ’, सोनुले भनेका छन्, ‘उनीहरु आफ्नो परिवारलाई छोडेर दैनिक रुपमा काममा गइरहेका छन् । यस्तो अवस्थामा मैले आफ्नो होटलमा उनीहरुलाई आश्रय दिँदा उनीहरुमा जोखिम कम हुन्छ र धेरै समय यात्रा गर्नुपर्ने छैन ।’
हाल चिकित्सक र कामदारहरु बस्दै आएको घरमा उनीहरुलाई जान रोक लगाइएको समाचार सार्वजनिक भएको थियो । उनीहरुका छिमेकीले चिकित्सक र कामदारले आफूलाई रोग सार्न सक्ने भयले उनीहरुलाई घरबाट टाढा राख्ने प्रयास भइरहेको थियो ।
सोनुका अनुसार मुम्बईको जुहूमा कैयौं अस्पताल छन् । यस्तो अवस्थामा त्यहाँ काम गर्ने चिकित्सक तथा कामदारलाई उनको होटल शक्ति सागरमा आराम गर्न र सुत्न कोठा दिएको सोनुले खुलाएका छन् ।
