धरान । विश्वव्यापी महामारी कोरोनाको आतंक पहिले भन्दा निकै कम भएपनि कोरोना संक्रमितहरु दिन प्रतिदिन बढ्दै गएका छन् । चार महिनाको अवधिमा विश्वकै अर्थतन्त्रमा गिरावट आइसकेको छ । विश्वलाई नै प्रभावमा पारेको यो प्रकोपले हाम्रो देश नेपाललाई नछुने कुरै भएन । भूकम्पले थालिएर विस्तारै चल्बलाउदै गरेको यो अवस्थामा कोरोना प्रकोपले पुरै धरासायी भएको छ ।
यसको लागि हामी सबै नेपाली एक हुनु जरुरुी रहेको र विश्वलाई नै हामी नेपाली एक छौ भन्ने देखाउन यो सुनौलो दिन पनि रहेको बताउँदै गायक शिव लामिछाने ‘शिवाज’ले नयाँ गीत ‘हामी छौं साथ छ हातमा हात’को भिडियो दर्शकमाझ ल्याएका छन् ।
कृपा अनप्लग्ड म्युजिकल शोको परिकल्पना तथा निर्माण गरेका गायक शिवले कृपा दृश्य डिजिटल को युट्युब च्यानलमार्फत भिडियो सार्वजनिक गरेका हुन् । हर्कुलश बस्नेतको शब्द तथा संगीत रहेको गीतमा अल्मोडा राना उप्रेतीको संगीत संयोजन रहेको छ भने रञ्जित बल्लभ उप्रेती भिडियो सम्पादन छ । भिडियोमा कलाकारको रुपमा नेपाललगायत चीन, जर्मनी, हङकङलगायतका देशहरुबाट ४८ जना नेपालीहरु फिचर्ड छन् ।
