काठमाडौं । गायक नरेन्द्रबल्लभ पन्तको नयाँ गीत ‘निरमाया (मरें नि)’को भिडियो सार्वजनिक भएको छ । गीतमा सुनिल संगमको शब्द र जुगल डंगोलको संगीत छ । नरेन्द्रले आठ वर्ष अघि पहिलो म्यूजिक एल्बम ‘अर्बान मुड्स’ बजारमा ल्याएका थिए । सोही एल्बमको एक गीत ‘निरमाया (मरें नि)’ अहिले पुनः रेकर्डिंग गरी भिडियोसहित सार्वजनिक गरिएको हो । गीतमा लोक र रक गीतको फ्यूजन पाईन्छ ।
सुब्रतराज आचार्यको निर्देशन रहेको भिडियोमा बिजु पार्की र सिर्जना जिसीको अभिनय रहेको छ । पार्की भारतीय कोरियोग्राफर टेरेन्स लुइसका सहायक हुन् । भिडियोमा शुभम भुजेलको कोरियोग्राफी रहेको छ । कोरियोग्राफर भुजेल ‘बुगी उगी’को टप फाइभ प्रतिष्पर्धी हुन् । भिडियोमा नवराज उप्रेतीको छायांकन र नविन निरौलाको सम्पादन रहेको छ । गीतमा आफुलाई मन परेकी युवतीको तारिफ गरिएको छ ।
व्यवसायमा माइक्रो फाइनान्सबाट करियर शुरु गरेका गायक पन्त हाल हाइड्रोपावर, रियल स्टेट, कन्ट्रक्सन, पानी तथा इनभेष्टमेन्ट कम्पनी लगायतमा आवद्द छन् । पन्तले संगीतकार शंकर थापा ‘स्माईल’को संगीतमा नयाँ गीत रेकर्ड गर्दैछन् ।
