मुम्बई(एजेन्सी) । बलिउड अभिनेता आयुष्मान खुराना आफ्नो फिल्मबाट लगातार विशेष पहिचान बनाइरहेका छन् । भारतमा कैयौं प्रतिष्ठित पुुरस्कार जितिसकेका आयुष्मान अब भने विश्वभर चिनिएका छन् । आयुष्मानको नाम विश्वप्रतिष्ठित पत्रिका टाइमले ‘टाइम सय प्रभावशाली’ व्यक्तिको सुचीमा राखेको छ । आयुष्मान मात्र एक भारतीय कलाकार हुन्, जसको नाम यो सूचीमा राखिएको हो ।
सूचीमा आयुष्मानका अलावा भारतका प्रधानमन्त्री नरेन्द्र मोदीको नाम पनि राखिएको छ । उनको नाम नेताको श्रेणीमा छ । आयुष्मानले आफ्नो इन्स्टाग्राममा यो कुराको जानकारी दिएका हुन् ।
टाइम पत्रिकामा आयुष्मानका लागि दीपिकाले एक नोट लेखेकी छन् । ‘मलाई आयुष्मान खुराना उनको डेब्यू फिल्म ‘विक्की डोनर’बाट सम्झन्छु । त्यसो त उनी मनोरन्जन उद्योगमा कैयौं अन्य माध्यमबाट वर्षौदेखि जोडिएका छन् । तर आज तपाईं र हामी जुन विषयमा कुराकानी गरिरहेका छौं । त्यो उनको फिल्म माध्यमबाट निभाएको सानदार भूमिकाको प्रभावले हो । जहाँ प्रायः पुरुषको भूमिका मर्दको निर्धारित सीमामा हुन्छ । तर आयुष्मानले भने यी सबै परम्परालाई तोडेका छन्’, दीपिकाले लेखेकी छन् ।
