न्यूयोर्क(एजेन्सी) । अमेरिकी राष्ट्रपति डोनाल्ड ट्रम्प र उनकी पत्नी मेलानिया ट्रम्पलाई कोरोना संक्रमण भएको छ । ट्रम्पले सामाजिक सन्जालमार्फत आफूहरुमा कोरोना संक्रमण रहेको र क्वारेन्टाइनमा बस्ने निर्णय लिएको जानकारी दिएका छन् । यसअघि ट्रम्पका एक वरिष्ठ सल्लाहकार होप हिक्समा कोरोना संक्रमण देखिएपछि ट्रम्पले आफू र पत्नी मेलानिया क्वारेन्टाइनमा जान लागेको जानकारी दिएका थिए ।
३१ वर्षीया होप राष्ट्रपति ट्रम्पको सबैभन्दा नजिकका व्यक्ति हुन् । उनी राष्ट्रपति ट्रम्पका साथ उनको एयर फोर्स वन विमानमा यात्रा गर्छिन् । पछिल्लो दिनहरुमा चुनावी यात्रामा उनी ट्रम्पका अन्य सल्लाहकारका साथ उपस्थित थिइन् । मंगलबारको प्रेसिडेन्सियल डिबेट भन्दा अगाडि मिनेसोटामा चुनावी अभियानका दौरान उनी ट्रम्पका साथ देखिएकी थिइन् ।
