मुम्बई(एजेन्सी) । बलिउड अभिनेत्री करिना कपूर चाँडै नै दोस्रो सन्तानलाई जन्म दिँदैछिन् । गर्भवती भएको बेला पनि यी अभिनेत्री आरामको सट्टा काममा नै व्यस्त छिन् । उनले गर्भवती भएकै समयमा दुई विज्ञापनको सुटिङ गरिसकेकी छन् । करिना पछि अभिनेत्री अनुष्का शर्माको व्यस्तता पनि उस्तै छ । यी अभिनेत्रीले ७ महिनाको बच्चा पेटमा बोकेर एक विज्ञापनको सुटिङ गरेकी छन् । जसको तस्बिर सामाजिक सन्जालमा भाइरल भइरहेको छ । त्यसो त करीना र अनुष्काबाहेक अन्य अभिनेत्रीले पनि गर्भवती अवस्थामा कामलाई छोडेनन् ।
सन् २००१ मा रिलिज मल्टीस्टारर फिल्म ‘आमदनी अठन्नी खर्चा रुपैया’मा जूही चावला अभिनेता गोविन्दाका साथ देखिएकी थिइन् । यो फिल्मको छायांकनताका जुही गर्भवती थिइन् । यसबाहेक दोस्रो गर्भवतीको ७ महिनामा अभिनेत्री ‘झंकारबीट’को सुटिङमा थिइन् ।
सन् १९९७ मा रिलिज भएर हिट भएको फिल्म ‘जुदाई’मा श्रीदेवी, अनिल कपूर र उर्मिला मातोडकरले प्रमुख भूमिका निभाएका थिए ।
फिल्मको सुटिङको समयमा श्रीदेवी पहिलोपटक आमा बन्ने तयारी गरिरहेकी थिइन् । आफ्नो प्रतिबद्धता अनुरुप श्रीदेवीले गर्भवती अवस्थामा पनि फिल्मको सुटिङ गरेकी थिइन् । मार्च ६ १९९७ मा जान्हवी कपूर जन्मिइन् । त्यसको केही महिना पछि फिलम रिलिज भएको थियो ।
फिल्म ‘वी आर फेमिली’को सुटिङका समयमा काजोल आफ्नो दोस्रो छोरा यूगलाई जन्मदिने तयारीमा थिइन् । आफ्नो प्रतिबद्धता अनुरुप फिल्मको सुटिङमा मात्र होइन, उनले गर्भवती अवस्थामा फिल्मको प्रमोसनमा पनि उत्तिकै सक्रियता देखाइन् ।
अभिनेत्री करीना कपूर दुई वर्ष पछि फिल्म ‘वीर दी वेडिङ’बाट कमव्याक गरेकी थिइन् । यो फिल्मको सुटिङको समयमा उनी गर्भवती थिइन् । अब उनी चाँडै दोस्रो बच्चाको जन्मपछि यो फिल्मको सिक्वेलको काम शुरु गर्दैछिन् । यसबाहेक उनले केही दिन अघि मात्र फिल्म ‘लाल सिंह चड्डा’को सुटिङ पुरा गरेकी थिइन् ।
सन् १९८३ मा रिलिज भएको मल्टी स्टारर फिल्म ‘रजिया सुल्तान’मा ड्रिम गर्ल हेमा मालिनीले निकै महत्वपूर्ण भूमिकामा अभिनय गरेकी थिइन् । यो फिल्ममा उनी कहिले गर्मीमा ऊँटमा देखिइन् भने कहिले दौडिएको अवस्थामा थिइन् । यो फिल्मको सुटिङको समयमा उनी गर्भवती थिइन् ।
अभिनेत्री माधुरी दिक्षितले फिल्म ‘देवदास’मा चन्द्रमुखीको महत्वपूर्ण भूमिका निभाइन् । यो फिल्मको छायांकनताका उनी गर्भवती थिइन् । फिल्मको सुटिङ भइरहँदा उनै उनले आफू गर्भवती भएको थाहा पाइन् । तर पनि उनले सुटिङ जारी राखिन् । यो फिल्मको गीत ‘मार डाला’को सुटिङमा उनी तीन महिनाको गर्भवती थिइन् । तर उनको प्रस्तुतिमा उनी गर्भवती थिइन् भन्ने थाहा पाउन मुस्किल थियो ।
बलिउडको सबैभन्दा राम्रो फिल्ममध्ये एक ‘शोले’को सुटिङका समयमा अभिनेत्री जया बच्चन गर्भवती थिइन् । उनी यही समयमा पहिलोपटक आमा बन्ने तयारीमा थिइन् । फिल्म साइन गरेपछि पनि उनी नियमित सुटिङमा गइन् । अभिनेत्री कोंकना सेन शर्माले ‘मिर्च’ र ‘राइट या रङ’को सुटिङ सकेपछि आफू गर्भवती रहेको घोषणा गरिन् । उनले सुटिङ पछि फिल्मको प्रमोसनमा पनि सहभागिता जनाइन् । नेटफ्लिक्सको सिरिज सेक्रेड गेम्समा जोजोको भूमिकामा अभिनय गर्ने सुरवीन चावला सिरिजको दोस्रो सिजनको सुटिङको समयमा गर्भवती थिइन् ।
