काठमाडौं । निर्देशक दिनेश राउतले निर्देशन गर्ने फिल्म ‘प्रकाश’मा अभिनेता प्रदीप खड्कासँग धनगढीकी रेनु योगीले रोमान्स गर्ने भएकी छन् । फागुन दोस्रो साताबाट फ्लोरमा जाने फिल्मबाट रेनुको फिल्मी ‘डेब्यू’ हुनेछ ।
निर्देशक राउतले फिल्मका लागि रेनुको प्रस्तुति र चरित्र मिल्ने भएकाले अडिसनमार्फत छनोट गरिएको बताए । नाट्यकर्मी तथा अभिनेता अनुप बरालले अडिसनमार्फत रेनुलाई कास्टिकङ गरेका हुन् ।
ब्याचलर अध्ययन गरेकी रेनु थिएटर कलाकार हुन् । उनले सन् २०१३ मा दयाहाङ राईसँग ‘मितज्यू’ नाटक खेलेकी थिइन् । उनले हालसम्म १० वटा भन्दा बढी नाटक, सर्ट फिल्म र ‘एसिड काण्ड’ नामक डकुमेन्ट्रीमा काम गरिसकेकी छन् ।
जुम्लामा छायांकन गरिने फिल्मको ४५ दिनको सुटिङ सेड्युल राखिएको छ । बिनिस इन्टरटेनमेन्टको प्रस्तुति रहेको फिल्ममा महेन्द्र अधिकारीको लगानी र विकास सुवेदीको कथा हुनेछ ।
