काठमाडौं । नेपालमा पहिलो पटक एक्सन जनरामा म्यूजिक भिडियो ‘गन्तव्य’ निर्माण भएको छ । आरके खत्रीको स्वरमा रहेको यो गीतको भिडियोमा अभिनेत्री सुरक्षा पन्त र अभिनेता निराजन प्रधान फिचर्ड छन् ।
भिडियोमा सुरक्षालाई एक्सन अवतारमा देखाइएको छ । गीतमा सूर्य अधिकारीको र्याप, गायक खत्रीकै संगीत तथा गायकद्वय खत्री र अधिकारीको शब्द छ । पैसाका लागि गलत काममा होमिएका निराजन र सुरक्षाबीचको प्रेम र पैसाका लागि निराजनले सुरक्षामाथि गर्ने गलत व्यवहारको कथा भिडियोमा देखाइएको छ ।
हरी हुमागाईंको निर्देशन रहेको भिडियोमा हरीकै कन्सेप्ट छ । भिडियोमा शंकर महर्जनको द्वन्द्व, प्रविन श्रेष्ठको कलर, राजेश शाहको भीएफएक्स र दीपु पौडेलको मेकअप छ । उत्तम हुमागाईं र राजेन्द्र हुमागाईंले छायांकन गरेको भिडियो देवन प्रोडक्सनले निर्माण गरेको हो ।
अभिनेत्री पन्तले नेपाली समाजमा देखिरहेकै घटनालाई भिडियोमा उतारिएको बताइन् । ‘जीरो टोलरेन्सको आइडियामा भिडियो बनाएका हौं । एक्सनमा भिडियो बनाउने निर्देशक हरी हुमागाईंको आइडिया मन पर्यो अनि मैले पनि केही सिक्न पाउछु भन्ने लोभले काम गरेको हुँ,’ उनले भनिन् ।
पहिलो पटक एक्सन जनराको म्यूजिक भिडियोमा काम गरेका निराजनले ‘गन्तव्य’ गीतको भिडियोले नेपाली समाजको अहिलेको अवस्था बोलेको बताए । भिडियोले महिलालाई मजबुत बन्न थप हिम्मत दिने उनको विश्वास छ ।
गायक खत्रीले भिडियोले गीतलाई न्याय गरेकोमा खुशी व्यक्त गरे । अन्याय र अत्याचारको विरुद्धमा महिलाहरु बलियो भएर अगाडि बढ्नु पर्छ भन्ने सन्देश भिडियोले दिने उनले बताए ।
त्यस्तै, निर्देशक हुमागाईंले म्यूजिक भिडियोमा एक्सन सिक्वेन्स राख्न चुनौतीपूर्ण भए पनि आफूहरुले इमानदार प्रयास गरिएको बताए । सुरक्षाले तीन दिन एक्सन तालिम लिएर भिडियोमा एक्सन सिन दिएको उनको भनाई छ ।
