काठमाडौं । जेठ ५ गते रिलिज हुने नेपाली फिल्म ‘गणपति’को गीत ‘गाढा भैदियो’ सार्वजनिक भएको छ । गीत छोटो भर्सनमा रिलिज गरिएको छ । गीतलाई फिल्ममा नै पुरा हेर्न सकिने निर्देशक सबिन अधिकारीले बताए।
गीतमा निर्देशक अधिकारीको शब्द तथा संगीत तथा अनिश अधिकारी र बेनिशा पौडेलको स्वर छ। भिडियोमा फिल्मका मुख्य पात्रहरु मुकुन भुषाल र मेनुका प्रधानको दुई जीवनकाललाई देखाइएको छ।
निर्देशक अधिकारीले कोही व्यक्ति कुनै बेला त्यही समाजको भगवान बन्ने र उही व्यक्तिलाई हाम्रै समाजले कसरी नारकीय व्यवहार गर्छ भन्ने विषय फिल्ममा प्रस्तुत गरिएको बताए । यसमा मुकुन र मेनुकाको साथमा कविता न्यौपाने, सूर्यमाला खनाल, जयनन्द लामा, प्रकाश घिमिरे, राजाराम पौडेल, पुष्कर गुरुङ, अंशु मानन्धर, कालु राना, टीका भक्त जिरेल, देवेन्द्र बब्लु, शुशील पोखरेल लगायतको अभिनय रहेको छ ।
निर्माता लक्ष्मण थापाले फिल्मले आस्थाको रुपमा रहेका भगवान र भौतिक रुपमै पृथ्वीमा उपस्थित मानिसबीचको फरक देखाउने बताए। एबिगम्यान फिल्मसको ब्यानरमा थापाले निर्माण गरेको यस फिल्ममा हरिबहादुर घलेको छायांकन रहेको छ ।
