काठमाडौं । फिल्म ‘एक भगवत् गीता’को टिजर सार्वजनिक भएको छ । टिजरमा विपिन कार्की, सुहाना थापा र धीरज मगरलाई प्राथमिकता दिइएको छ । टिजरमा विपिन लैंगिक अल्पसंख्यकको पात्र कमलामाईको अवतारमा देखिएका छन् । समग्रमा फिल्मको टिजर विपिन र सुहाना वरपर घुमेको देखिन्छ ।
ट्रासजेन्डर चरित्रमा देखिएका विपिन हतियार लिएर लडाइँमा उत्रिएका छन् । टिजरमा जनकपुरको जानकी मन्दिर र जनकपुरको सेटिङ देखाइएको छ ।
झरना थापा निर्देशित फिल्ममा कवीर खड्का, जेविश र जेविन श्रेष्ठ, सञ्जोग रसाइली, मुकेश झा, अनुराग कुँवर, रामकैलाश ठाकुर र धीरज ठाकुरको पनि अभिनय छ । सुनिलकुमार थापाको निर्माण रहेको फिल्मको कथालाई झरनाले लेखेकी हुन् । झरनासँगै सरिन पोखरेल, परिच्द सेन, पुरुषोत्तम ढंगेल र कृष्णको पटकथा छ ।
राजेश श्रेष्ठको छायांकन, मित्र डी गुरुङको सम्पादन, हिमाल केसीको द्वन्द्व, कविराज गहतराजको कोरियोग्राफी तथा शैलेश श्रेष्ठको ब्याकग्राउण्ड स्कोर छ । सुहाना इन्टरटेनमेन्ट र सुनिल थापा प्रोडक्सनको ब्यानरमा फिल्म निर्माण भएको हो । यो फिल्म भदौ २९ गते रिलिज हुँदैछ ।
