काठमाडौं । फिल्म ‘पशुपति प्रसाद’को तेस्रो सिक्वेल ‘पशुपति प्रसाद ३’को घोषणा गरिएको छ । दशैंको मौका पारेर फूलपातीबाट प्रदर्शनमा आएको फिल्म ‘पशुपति प्रसाद २ः भष्मे डन’को चौथो हप्ता प्रदर्शको खुशियाली साट्दै शुक्रबार राजधानीमा आयोजित कार्यक्रममा निर्माण टिमले ‘पशुपति प्रसाद ३’को घोषणा गरेका हुन् । ।
फिल्ममा दीपेन्द्र के. खनालको निेर्दशन र खगेन्द्र लामिछानेको लेखन रहनेछ । टुकी आर्ट्सबाट रोजिना सिटौलाले फिल्मको निर्माण गर्नेछिन् । निर्देशक खनालले ‘पशुपति प्रसाद’ जुन कथाबाट सुरु गरेको थियो, त्यसलाई टुंग्याउन पशुपति प्रसाद ३ बनाउन लागिएको बताए । ‘दोस्रो सिक्वेल भष्मे डनको कथामा आधारित रहे पनि तेस्रो सिक्वेल पूर्ण रुपमा पशुपति प्रसादकै कथामा आधारित हुनेछ’, उनले भने ।
फिल्मलाई आगामी वर्ष छायांकन गरेर त्यही वर्ष रिलिज गर्ने तयारीमा निर्माण टिम रहेको छ । लेखक लामिछानेले तेस्रो सिक्वेललाई तर्कसंगत, न्यायोचित र सुन्दर बनाउन प्रयास गर्ने बताएका छन् । फिल्ममा खगेन्द्र लामिछानेसँगै विपिन कार्की, वर्षा सिवाकोटी र स्वस्तिमा खड्काको अभिनय रहने बताइएको छ ।
