काठमाडौं । आगामी वैशाख २१ गतेबाट रिलिज हुने फिल्म ‘मनसरा’को टिजर सार्वजनिक भएको छ । टिजरमा फिल्मका प्रमुख कलाकारहरु दयाहाङ राई, मिरुना मगर, प्रविण खतिवडा र मेनुका प्रधान फिचर्ड छन् ।
टिजरमा प्रविणले मिरुनालाई बढी ध्यान दिँदा प्रविणकी पत्नी मेनुका प्रधानको शंकालु भावलाई देखाइएको छ । टिजरमा मिरुनाको छोरालाई प्रविणले स्कुल पु¥याउने गरेको र प्रविण मिरुनासँग नजिक हुन खोजेको देखाइएको छ ।
लेखक तथा निर्देशक उपेन्द्र सुब्बा निर्देशित फिल्ममा दया, मिरुना, प्रविण तथा मेनुकाका अलावा हेमन्त बुढाथोकी शान्ति गिरी, नेनहान राईको अभिनय रहेको छ । फिल्ममा छायाकार शैलेन्द्रध्वज कार्की निर्माता छन् भने विष्णकुमार लिम्बु, मनोरथ पोखरेल, पर्शु अधिकारी, पिटर गुरुङ र जीवन लिम्बु थाक्लुङ सह–निर्माता छन् । फिल्म ‘जारी’ पछि ‘मनसरा’ उपेन्द्रको दोस्रो निर्देशकीय फिल्म हो ।
फिल्ममा निमेश श्रेष्ठको सम्पादन, अर्जुन कार्कीको रंग संयोजन, श्रवलराज पाण्डेको साउण्ड डिजाइन, मानाहाङ लावती, मनिक शंखर र सुभम चाम्लिङ राईको संयुक्त कला निर्देशन छ ।
सिजन दाहाल कार्यकारी निर्माता रहेको फिल्ममा किरण चाम्लिङ राई मुख्य सहायक निर्देशन छन् । एप्पल इन्टरटेन्मेन्ट कम्पनीले फिल्मको वितरण गर्नेछ ।
