काठमाडौं । निर्देशक प्रदीप शाहीको निर्देशनमा बन्ने नयाँ फिल्ममा अभिनेता विजय लामा अनुबन्धित भएका छन् । साइ–फाई जोम्बी थ्रिलर जनरामा निर्माण हुने फिल्ममा यसअघि प्रदीप खड्का र बेनिशा हमाल फाइनल भइसकेका छन् ।
फिल्मका कार्यकारी निर्माता विनोद सुवेदी खत्री ‘क्षितिज’ले फिल्ममा विजयको प्रमुख भूमिका रहने बताए । फिल्मको कथा निर्देशक शाहीले नै लेखेका हुन् ।
गत वर्ष प्रदर्शनमा आएको फिल्म ‘अन्तिम संस्कार’बाट तारिफ बटुल्न सफल निर्देशक शाहीको फिल्मको टाइटल भने सार्वजनिक गरिएको छैन । साइ प्रोडक्सन नेपालको ब्यानरमा निर्माण हुने फिल्ममा ह्याम्साएर एकाउन्टेनको सहकार्य रहनेछ ।
फिल्मको अन्य कलाकार र प्राविधिक पनि फाइनल हुने क्रममा रहेको निर्देशक शाहीले जानकारी दिए ।
