काठमाडौं । फिल्म ‘गाउँ आएको बाटो’को टिजर सार्वजनिक भएको छ । आगामी जेठ २५ गतेबाट नेपालमा रिलिज हुने फिल्मको टिजरमा फिल्मका प्रमुख कलाकारहरु दयाहाङ राई, पशुपति राई र बाल कलाकार प्रसन राई फिचर्ड छन् ।
टिजरमा बाबुको भूमिकामा देखिएका दयाहाङले छोरा प्रसनलाई नून लिन धरान जाने बाटो देखाएका छन् । दयाहाङले छोरा प्रसनलाई सुन्तलाको ढाकर बोकेर बयखु खोला हुँदै नौ डाँडा काटी दुई दिनमा धरान पुग्ने गरेको बताएको देखाइएको छ ।
टिजरमा गाउँमा बस आउँदा गाउँले स्वागत गर्न बसेको र केटाकेटीहरु खुशीले बसतिर दौडिएको देखाइएको छ । गाउँमा बाटो र बस पुग्दाको खुशीलाई टिजरमा देखाइएको छ ।
महेश राई र नवीनको संयुक्त लेखन रहेको फिल्ममा केशव राई, प्रेम सुब्बा र राज थापाको पनि अभिनय छ । मञ्जु राई, नरहाङ राई, भीम राई र देवराज राई कार्यकारी निर्माता रहेको फिल्ममा जोस हेरमको छायाँंकन, क्वान पुन लुङको सम्पादन, हाइडी लीको संगीत छ ।
यो फिल्म ‘टोरन्टो इन्टरनेसनल फिल्म फेस्टिभल’, ‘बुसान इन्टरनेसनल फिल्म फेस्टिभल’, ‘गोटेबोर्ग फिल्म फेस्टिभल’, ‘मोस्ट्रा इन्टरनेसनल दी सिनेमा साउलो पाउलो इन्टरनेसनल फिल्म फेस्टिभल’, ‘जियो मिआमी मुम्बई इन्टरनेसनल फिल्म फेस्टिभल’ र ‘बेइजिङ इन्टरनेसनल फिल्म फेस्टिभल’मा प्रिमियर भइसकेको छ ।
निर्देशक सुब्बाले यसअघि ‘खाङरी’, ‘नुमाफुङ’, ‘दलान’, ‘गुडबाई काठमाडौं’ र ‘सिंहदरबार’ निर्देशन गरिसकेका छन् ।
