काठमाडौं । राजबहादुर सानेको निर्देशनमा निर्माण भएको फिल्म ‘सिटामोल’को जापान प्रदर्शन अधिकारी बिक्री भएको छ । फिल्मको जापान प्रदर्शन अधिकार गरिमा फिल्मस्ले किनेको हो । निर्माण टिमले दिएको जानकारी अनुसार फिल्मको नेपाल र जापानमा एकैदिन रिलिज गर्ने सहमतिसहित प्रदर्शन अधिकार बिक्री गरिएको हो ।
निर्देशक सानेले नेपालमा फिल्मको प्रदर्शन मिति घोषणा नहुँदै फिल्मको विदेश राइट्स बिक्री भएसँगै फिल्मलाई समीक्षकीय र प्राविधिक रुपमा अब्बल बनाउने चुनौती थपिएको बताए । फिल्मको विदेशका अन्य देशबाट पनि प्रदर्शन अधिकारको लागि कुरा आएकाले चाँडै प्रदर्शन मिति घोषणा गरेर प्रचारमा जुट्ने जानकारी दिए ।
हाल फिल्मको पोष्ट प्रोडक्सनको काम भैरहेको छ । फिल्मको काठमाडौंको केही प्रतिशत बाँकी छायांकन पनि पुरा गर्ने तयारीमा निर्देशक साने छन् । फिल्ममा अभिनेता सौगात मल्ल र बेनिशा हमालको मुख्य भुमिका रहेको छ । फिल्ममा उनीहरुले श्रीमान्(श्रीमतीको अभिनय गरेका छन् । माओवादी जनयुद्धको कथा फिल्मले उठान गरेको छ । यो फिल्ममा सौगातले जनयुद्धको घाइतेको भुमिका निवार्ह गरेका छन् ।
तुलसी देवी फिल्म प्रालीको ब्यानरमा निर्माण भएको फिल्ममा सौगात र बेनिशाका अलवा लोकेन्द्र लेखक, भुगोल कार्की, हिउँवाला गौतम, दिनेश रेग्मी, समिप निरौला, जानुका विश्वकर्मा, ज्ञानु सेञ्चुरी, पवन भट्टराई, काजल भुजेल र बालकलाकार करण नेपाली र आराध्या राज्यलक्ष्मी डिसीको अभिनय रहेको छ ।
फिल्मको कथा निर्देशक साने स्वंयमले लेखेका हुन् । बाबुल गिरीको संगीत रहेको फिल्ममा दिव्य सुवेदीको छायांकन छ । फिल्ममा भुगोल कुमार कार्की निर्माता, रामचन्द्र उपाध्यय, अप्सरा नेपाली, गंगाराम श्रेष्ठ, अजय कुमार बिक र कुमार केसी कार्यकारी निर्माता रहेका छन् ।
