काठमाडौं । नेपाली फिल्म ‘दर्पण छायाँ २’ मार्फत अभिनयमा उदाएका फिरोज तिमल्सिनाले गायनमा समेत आफूलाई अगाडि बढाईरहेका छन् । ‘नेपाल आइडल’ र ‘द भ्वाइस अफ नेपाल’को पहिलो सिजनमा काम गरेका फिरोजले आफ्नो गायन यात्रालाई निरन्तरता दिदै ‘यो कस्तो खुशी’ बोलको गीतको भिडियो सार्वजनिक गरेका छन् । फिरोजले स्वर भरेको गीतमा शब्द मिलन पोखरेल र सङ्गीत प्रकाश नेपालीको रहेको छ ।
पछिल्लो अध्यनको शिलशिलामा समय संयुक्त राज्य अमेरिकामा रहेका फिरोजले यसगीतमा आफु भन्दा टाढा रहेका प्रेमिल जोडीको कथा प्रस्तुत गरेको बताए ।
उनले भने, ‘प्रवासमा भएता पनि सङ्गीत प्रतिको लगावलाई छाड्न सकेको छैन् । यस गीतलाई तयार गर्दा टाढा रहेर माया गर्ने जोडीलाई कल्पना गरेर सोही भावमा स्वर भरेको थिएँ । यो गीतले टाढिएर पनि मायामा रहेकालाई भावनात्मक रुपमा बलियो हुन् अझैँ मदत गर्छ भन्ने लागेको छ ।’
यसको छायांकन अमेरिकाकै कोलोराडो राज्यको रमणीय दृश्यमा गरिएको छ । सार्वजनिक गीतको भिडियोमा ‘दर्पण छायाँ २’ मार्फत अभिनयमा उदाएकी अभिनेत्री सहारा कार्कीले अभिनय गरेकी छिन् । गीतको भिडियोमा उनलाई मनोज श्रेष्ठले साथ दिएका छन् । गीतको भिडियोलाई फिरोजले अनुप गिरीसँग मिलेर निर्देशन गरेका छन् ।
भिडियोमा सम्पादन, छायांकन र रङ्ग संयोजन पनि निर्देशक गिरीले नै गरेका छन् । यस गीतलाई फिरोजले आफ्नै युट्युब च्यानलमार्फत सार्वजनिक गरेका छन् ।
