काठमाडौं । आइफोन १४ प्रो–म्याक्सबाट खिचिएको नेपाली फिल्म ‘अ प्लेस अन्डर द सन’ अमेजन प्राइममा प्रसारण सुरु भएको छ । वन स्क्वाड फिल्म्सले यो फिल्मलाई अमेजन प्राइममा ल्याएको हो ।
अमेजनमा आए पनि पहिलो चरणमा यो फिल्म अमेरिका र क्यानडाको सर्भरमार्फत त्यहाँका दर्शकले मात्र हेर्न सक्नेछन् । फिल्मका निर्देशक जेसन लोप्चनले अन्य मुलुकका दर्शकमाझ यो फिल्म चाँडै आउने जानकारी दिए ।
यो फिल्मको ट्रेलर ओएसआर डिजिटलले युट्यबमा सार्वजनिक गरेको छ । फिल्मलाई चाँडै नेपालका दर्शकका लागि हलमा ल्याउने तयारी भइरहेको निर्देशक लोप्चनले बताए ।
क्राइम ड्रामा जनराको फिल्मले बाल्यकालदेखिका तीन साथीको कथा पस्केको छ । फिल्ममा मीरा गुरूङ, मीन घलान, मीरा गुरुङ, अम्शु शर्मा, विप्लव गौली, प्रजन पौडेल, प्रवेश एमसी, रिदेन श्रेष्ठको अभिनय छ ।
वान स्क्वाड फि ल्मको व्यनरमा निर्माण भएको फिल्ममा उमेश खड्का सह–निर्माता छन् । फिल्ममा प्रविण लिम्बुको छायांकन छ ।
