काठमाडौं । टिकटकर तथा मोडल मिस पबीले फिल्म ‘माग्ने राजा’ अनुबन्धित भएकी छन् । ऋषि लामिछानेको निर्देशन रहने यो फिल्ममा यसअघि केदार घिमिरे र वर्षा शिवाकोटी अनुबन्धित भइसकेका छन् । वास्तविक नाम पवित्रा शाखी रहेकी मिस पबीले शुक्रबार सामाजिक सञ्जालमार्फत आफू फिल्ममा जोडिएको जानकारी दिएकी हुन् ।
मिस पबी हाल विक्की अग्रवाल निर्देशित कमेडी टेलिभिजन शो ‘कमेडी दरबार’मा व्यस्त छिन् ।
उनले टिभी श्रृंखला ‘ख्यालठट्टा’मा पनि अभिनय गरेकी छन् । मुनाल घिमिरेको निर्माण रहने फिल्ममा सामिप्यराज तिमल्सिनाको लेखन छ ।
आरम्भ प्रोडक्सनको प्रस्तुति रहने फिल्ममार्फत निर्देशक लामिछानेले आठ वर्षपछि निर्देशनमा कमब्याक गर्दैछन् । उनले पछिल्लो पटक सन् २०१६ मा प्रदर्शन भएको ‘किस्मत २’ निर्देशन गरेका थिए ।
