काठमाडौं । ऐतिहासिक ब्लकबस्टर फिल्म ‘पूर्ण बहादुरको सारङ्गी’ फेम्ड निर्देशक सरोज पौडेलले निर्माण घोषणा गरेको फिल्म ‘कोशेढुंगा’को कलाकार लाइनअप पुरा भएको छ ।
निर्देशक सरोजका अनुसार फिल्ममा सुरक्षा पन्त, आर्यन सिग्देल, नीति शाह र प्रवीण खतिवडा अनुबन्ध भइसकेका छन् । थिम पोस्टरले पनि ‘कोशेढुंगा’मा महिला चरित्रले फिल्म लिड गर्ने अनुमान लगाइएको थियो ।
सरोजले निर्देशन गरेको ‘पूर्ण बहादुरको सारङ्गी’ले नेपालमा मात्रै करिब ५० करोड ग्रसकलेक्सन गरिसकेको छ । निर्देशक पौडेलका अनुसार फिल्मले अभाव, अग्लो सपना र संघर्षको कथा बोल्नेछ ।
फागुन २ गतेदेखि छायांकन हुने फिल्म २०८२ मा रिलिज हुनेछ । नरदेवी फिल्मसको प्रस्तुति रहेको फिल्ममा प्रेविल कँडेल र हरि महतको लगानी रहनेछ भने दिनेश खड्का कार्यकारी निर्माता रहेका छन् ।
बाबु श्रेष्ठको डीओपी रहने फिल्म सुरेन्द्र पौडेलले सम्पादन गर्नेछन् । फिल्ममा संगीत रिदम कँडेल र आषिश अविरलको रहनेछ भने कास्टिङ डिरेक्टर सुवलमणि सापकोटा हुन् ।
यो चलचित्रको छायांकन अगावै अन्तर्राष्ट्रिय प्रदर्शन अधिकार बिक्री भएको छ। अन्तर्राष्ट्रिय वितरण ‘सेभेन सिज इन्टरनेसनल’ कम्पनीले खरिद गरेको छ ।
