सौरभ भन्छन्–कर्मामा कर्मको खेलको कथा

काठमाडौं । निर्देशक सौरभ चौधरीले फिल्म ‘कर्मा’मार्फत आफूले कर्मको खेलको कथा भनेको बताएका छन् । जस्तो कर्म गर्यो त्यस्तै फल पाइन्छ भन्ने पूर्वीय दर्शनमा आधारित रहेर फिल्म बनाएको उनको भनाई छ ।

टिजरमा राखिएको संवाद ‘जे जान्छ, त्यो घुमेर आउँछ’ले पनि धेरै कुरा खुलाउने निर्देशक चौधरीको दाबी छ । ‘मान्छेले पाउने भनेको उसले गरेको कर्मको फल हो । अर्थात मान्छेले जे भोग्छ र जति भोग्छ । त्यो उसको कर्मकै फल हो’, निर्देशक चौधरी भन्छन्, ‘ढिलो चाँडो मात्रै हो । मान्छेले उसले असल कर्म गरे राम्रो खराब कर्म गरे त्यही अुनसार नराम्रो सजाय नै पाउँछन् ।

जतिसुकै गलत काम गरे पनि त्यसलाई भाग्यले सजाय दिने उनको विश्वास छ । ‘कसैले गलत काम गरेर म बाट तारिफ पाइरहेको छ भने पनि कुनै न कुनै दिन अर्को कसैबाट उसले त्यसको मूल्य चुकाउनुपर्छ,’ सौरभको विश्वास छ, ‘यही नै कर्मा हो । यसमा विश्वास गर्ने भएकैले मैले यो चलचित्र बनाएको हुँ । त्यसैले म भन्छु, सबैको राम्रो गरौँ ।’

आफूसँग नराम्रो गर्ने व्यक्तिलाई उसले राम्रो गर्न नसके त्यसको सजाय अर्को व्यक्तिबाट भए पनि मिल्ने उनको भनाइ छ । ‘कसैले मसँग नराम्रो गर्यो भने उसलाई मैले नराम्रो गर्न नसके पनि अर्कोले उसलाई नराम्रो गरेर ब्यालेन्स गर्छ,’ उनले भने ।

निर्देशक चौधरीले चैत २९ का लागि सबैभन्दा पहिला आफूले रिलिज डेट लिएको बताएका छन् । आफूले प्रदर्शन मिति तोक्दा अरु कुनै पनि फिल्म नरहेको उनको भनाइ छ ।

आफू छायांकनमा गएर आधाउदी सुटिङ गरेपछि मात्रै अरूले चैत २९ मा आउने भन्दै रिलिज डेट लिएको उनले बताए ।

फिल्ममा विपीन कार्की, उपासना सिंह ठकुरी, मुकुन भुसाल, दिब्यदेब, सरिता गिरी, बेन बस्नेत, सुज्यान सिलवाल, अनिल बुढाथोकी, निर्मल शर्मालगायतको अभिनय रहेको छ ।

नयाँ वर्ष २०८२ को छेको पारेर ‘कर्मा’ आगामी चैत २९ गते रिलिज हुँदैछ । फिल्मको कथा निर्देशक चौधरी स्वयंले लेखेका छन् । ‘कर्मा’को अन्तर्राष्ट्रिय प्रदर्शन अधिकार बिक्रीको अधिकार सेभेन सिज सिनेमाले लिएको छ । फिल्ममा भाष्कर स्वाँरको संगीत निर्देशन, कविराज गहतराजको कोरियोग्राफी, श्री श्रेष्ठको द्वन्द्व निर्देशन र निमेष श्रेष्ठको सम्पादन छ ।

तारानाथ न्यौपाने मुख्य सहायक निर्देशक रहेको सिनेमामा समीर मियाको भिएफए, उत्तम न्यौपानेको व्याकग्राउण्ड स्कोर, शाहिल खानको टिजर–ट्रेलर, विजय बाश्यालको पब्लिसिटी डिजाइन र राजेन्द्र मोक्तान कलरिस्ट रहेका छन् । आर्टिस्टिक इनटरटेनमेन्टको प्रस्तुति रहने ‘कर्मा’ मा वसन्त लम्सालको लगानी रहेको छ ।