काठमाडौं । फिल्म ‘जनै हराएको बाहुन’ मा अभिनेता सुशांक मैनाली अनुबन्धित भएका छन् । सुशांकले यसअघि फिल्म ‘साँघुरो’, ‘टलकजंग भर्सेस टुल्के’ लगायतका फिल्ममा अभिनय गरिसकेका छन् । चैतको अन्त्यबाट छायांकनमा जाने फिल्ममा सुशांक अनुबन्धित भएका हुन् ।
फिल्मले आमा र छोराबीचको इमोस्नल कथा भन्नेछ । यसले आमाको सुखका लागि छोराले गर्ने संघर्षको कथा देखाउनेछ ।
हिमाल न्यौपानेको डेब्यू निर्देशन रहने फिल्ममा सुशांक केही दिन अघिमात्र अनुबन्धित भएका हुन् । फिल्मको असोसियट निर्देशक ‘प्रेमगीत ३’ अभिनेता मनिष राउत छन् ।
फिल्ममा यसअघि नै विजय बराल, केकी अधिकारी, मिरुना मगर, गौरव पहाडी र रेअर राई अनुबन्धित भइसकेका छन् ।
हरितालिका तीजको अवसर पारेर आगामी भदौ १० गते फिल्म रिलिज हुने छ । पेपरक्लिप प्रालिले निर्माण गर्न लागेको फिल्मको कथा, पटकथा र संवाद भानुभक्त ढकालले लेखेका छन् । फिल्ममा थानेश्वर गौतमको संगीत रहनेछ ।
फिल्मको छायांकन चैत २५ गतेदेखि ४० दिन को सेड्युल अनुसार पाल्पा र काठमाडौंमा गरिनेछ । यस फिल्मका निर्माता आदित्य फिल्म्स रहेका छन् भने नवीन गुरुङले छायांकन गर्नेछन् ।
