काठमाडौं । गत शुक्रबारदेखि प्रदर्शनमा आएको फिल्म ‘डमरुको डण्डीबियो’ले सुरुवाती सुखद व्यापार गरेको छ । पहिलो दिन बस व्यवसायीको बन्दका कारण ५० प्रतिशत माथि अकुपेन्सी कायम गरेको फिल्मको शनिबार देशभरका हलमा ८० प्रतिशत माथि अकुपेन्सी रह्यो । दोस्रो दिन पनि माओवादीको बन्दको हल्लाका वाबजुद राजधानीमा सिंगल र मल्टिप्लेक्सका सिट हाउसफुल रहेको वितरक गोविन्द शाहीले बताए ।
‘बन्दको हल्लाले शनिबार बिहानका केहि शो प्रभावित बनेपनि दिउँसोका प्रायः शोज हाउसफुल भए । गंगा, गुण, गोपीकृष्ण, अष्टनारायणजस्ता हलमा दर्शकको ओभरफ्लो हुँदा मल्टिप्लेक्स अन्तर्गतका क्युएफएक्स, एफक्युब, सिने डी सेफ, बीएसआर, क्युज सिनेमाका अधिकाँस शोज हाउसफुल भएका छन् । यसलाई सुखद मान्न सकिन्छ ।’ उनले भने ‘फिल्मको दर्शक प्रतिक्रिया पनि राम्रो भएकाले आगामी दिनमा व्यापार बढ्ने आशा छ ।’
दर्शक प्रतिक्रिया बुझ्न शनिबार बेलुका गोपीकृष्ण, अष्टनारायण, कुमारी, जयनेपाल लगायतका हलमा सिनेमाका मुख्य कलाकार खगेन्द्र लामिछाने र अनुप बराल पुगेका थिए । जहाँ दर्शक प्रतिक्रियाले उत्साहित बनाएको खगेन्द्र र अनुपले बताए । ‘प्रत्येक फिल्ममा फरक विषयबस्तु र अवतारमा प्रस्तुत हुँदै आइरहेको छु । यसपटकको विषय र अभिनय दर्शकले मन पराउनु हुन्छ की हुदैन भन्ने डर थियो । दर्शकको उत्साहित प्रतिक्रिया आगामी दिनमा अझ राम्रो गर्ने उर्जा दिएको छ ।’ खगेन्द्रले भने ।
छेतेन गुरुङ निर्देशित फिल्मले पढाई सकेर लोपोन्मुख डण्डीबियो खेललाई पुनर्जागरण गर्न गाउँ पसेको कथा पस्केको छ । फिल्मलाई समिक्षक मिश्रीत प्रतिक्रिया दिँदा दर्शकले भने अत्याधिक रुचाएका छन् । जसले गर्दा आगामी दिनमा माउथ पब्लिसिटीले सिनेमाको व्यापार राम्रो हुने अनुमान गरिएको छ । फिल्ममा खगेन्द्र र अनुपका अलावा मेनुका प्रधान, बुद्दी तामाङ, अंकित खड्का, आशान्त शर्मा, लक्ष्मी बर्देवा, मिश्री थापा, इंगि होपू कोइंच सुनवार, नमिता घिसिङ लगायतका कलाकारको अभिनय छ । फिल्ममा नोर्बु छिरिङ घले र विनोद गुरुङको संयुक्त लगानी रहेको छ भने खगेन्द्र लामिछानेको लेखन, हरि हुमागाईंको छायाँकन, निमेष श्रेष्ठ र प्रितम पाण्डेको सम्पादन रहेको छ ।
