काठमाडौं । त्रिकोणात्मक प्रेमकथानक फिल्म ‘रेनी’ को गीत ‘मलाई नाइँ नाइँ’ सार्वजनिक भएको छ । भदौ ८ गतेबाट प्रदर्शनमा आउने फिल्मको आइतबार राजधानीमा पत्रकार र फिल्मकर्मीमाझ गीत र ट्रेलर सार्वजनिक गरिएको हो । विमला मल्ल र संजीव मल्लले निर्माण गरेको फिल्मको गीतमा नवअभिनेत्री सनम मल्ल र नायक दिपक ढकालले फिचरिङ गरेका छन् ।
पुस्कर सुनुवारको स्वर र संगीत रहेको उक्त गीतको कोरियोग्राफी मदन खड्काले गरेका हुन् । गिरिश रिजालको निर्देशनमा बनेको फिल्ममा सरोज खनाल, सनम मल्ल, दीपक ढकाल,सुरवीर पण्डित, रमेश लम्साल, बबिता लम्साल,टंक डुम्रे,गुरु भुटिया, बिजय तिखातारिलगायतका कलाकारले अभिनय गरेका छन् ।
कार्यक्रममा निर्मात्री विमलाले आफूहरु फिल्म क्षेत्रमा नयाँ भए पनि फिल्म चाहिँ परिपक्क बताएको बताइन् । फिल्मकी लेखक र गीतकारसमेत रहेकी नवनायिका सनमले फिल्ममा मायाप्रेम, हाँसो, रोदन, द्वन्द्वसँगै सामाजिक बिषयलाई पनि प्रस्तुत गरिएको बताइन् । निर्देशक गिरिशले फिल्म आफ्ना लागि विशेष भएको बताउदै दर्शकले पनि मन पराउने दावी गरे ।
शाही मल्ल फिल्मस्को ब्यानरमा निर्मित फिल्मलाई गोबिन्द शाहीले वितरण गर्दैछन् । जयराम रिजालले खिचेको फिल्मका गीतमा बिनोद खुम्बुको पनि संगीत छ । फिल्मको द्धन्द्ध राजु किराँतीले निर्देशन गरेका हुन् ।
