काठमाडौ । अमेरिकाको बाल्टीमोरमा फिल्म ‘तुँवालो’ को प्रिमियर गरिएको छ । यो फिल्म बाल्टीमोरमा दुई शो देखाइएको हो । फिल्मले दलित समुदाय भित्रको दलित र भेदभावको कथासँगै वैदेशिक रोजगारको कथालाइ पनि समेटेको छ ।
फिल्मको शोमा निर्माता तथा कलाकार गिरीप्रसाद सुनारलाई नासो संस्थाका तर्फबाट सम्मान गरिएको थियो । मेरिल्याण्ड तथा पेन्सिलभेनिया राज्यका अवैतानिक महावाणिज्यदुत प्रेमराजा महतलगायतले सम्मान गरेका थिए ।
विभिन्न किसिमका सामाजिक भेदभावको विषयमा केन्द्रित भएकोले फिल्मको प्रिमियम शो बाल्टिमोरमा गरिएको नासोका अध्यक्ष गोपाल विश्वकर्माले बताए । प्रिमियर शोमा फिल्मले उठाएको विषय र फिल्मको प्रस्तुतिले तारिफ बटुलेको निर्माता सुनारले जानकारी दिए ।
दीपक परियारको निर्देशन रहेको फिल्ममा सुशील क्षेत्री, पुजा पराजुली, रमेश आब्जु, सुरेन्द्र बराल, रस्मि भट्ट, गिरीप्रसाद सुनार, भिमसेन श्रेष्ठ लगायतका कलाकारको अभिनय छ । फिल्ममा भिमसेन श्रेष्ठ, गिरीप्रसाद सुनार र रमेश आब्जुको लगानी छ । नेपालमा भने फिल्म वैशाखमा रिलिज हुनेछ ।
