काठमाडौं । लेखक तथा निर्देशक शिवम् अधिकारीको निर्देशनमा बन्ने नयाँ फिल्म ‘कोपिला’ को चितवनमा मुहुर्त गरिएको छ । चितवनको हाकिमचोकमा रहेको मलिका मन्दिरमा आइतबार फिल्मको मुहुर्त गरिएको हो । मुहुर्त कार्यक्रममा उद्योग वाणिज्य संघ चितवनका अध्यक्ष सहललाल प्रधानले क्ल्याप, फिल्मकर्मी ऋद्धिचरण श्रेष्ठले निर्देशन, स्थानीय समाजसेवी गेरेन्द्र मानन्धरले नरिवल फुटाउँदा कलाकारहरू सरिता गिरी, गणेश गिरी र सन्जिवनी खरेलले मुहुर्त सट दिएका थिए ।
निर्देशक तथा लेखक अधिकारीले फिल्म गाउँ समाजमा घट्ने घटनामा आधारित रहेको बताए । फिल्मका प्रस्तुतकर्ता गणेश गिरीले यस अघि निर्माण गरेको ‘पञ्चायत’ जस्तै ‘कोपिला’ पनि सामाजिक कथाबस्तुमा आधारित रहेको बताए ।
गणेश गिरिको प्रस्तुति रहेको फिल्ममा चितवनका युवा व्यवसायी करुणाकर घिमिरे र चलचित्र पत्रकार मणिराज गौतमले लगानी गर्नेछन् । सुबासराज काफ्ले कार्यकारी निर्माता रहेको यस फिल्ममा समिर मिया, रामेश्वर र मेनुका ढुंगाना सह निर्माता छन् ।
फिल्ममा सरिता गिरी, गणेश गिरी, सन्जीवनी खरेल, ऋद्धिचरण श्रेष्ठ, बिमल पौडेल, पुष्प आचार्य, सुशान्त श्रेष्ठ, अस्मिन घिमिरे, अस्मिता जुरेली, प्रतिक्षा खड्का, प्रकृति खरेल, राखी क्षेत्रीलगायतको अभिनय रहनेछ । फिल्ममा रामेश्वर कार्कीको छायांकन, समिर मियाको सम्पादन र दिपक शर्माको संगीत छ । चितवन आसपासमा छांयाकन गरिने फिल्म करिब ८० लाख लगानी निर्माण हुने निर्माण पक्षले जनाएको छ ।
