काठमाडौ । निर्देशक उदय सुब्बाको निर्देशन रहेको फिल्म ‘आरुशी’ को छायांकन शनिबार सकिएको छ । प्रदेश नं १ का विभिन्न रमणिय स्थानहरुमा छायांकन गरि निर्माण यूनिटले प्याकअप गरेको हो । निर्देशक सुब्बाका अनुसार पूर्वको चैनपुर, ताप्लेजुङ, संखुवासभाको गुफापोखरी, झापा, धनकुटा र इलामका मनमोहक स्थानमा फिल्म खिचिएको छ ।
त्रिकोणात्मक प्रेमकथा बोकेको फिल्मबाट रमा लिम्बु र इशक राइले डेब्यू गर्दैछन् भने फिल्ममा कला राइको मुख्य भुमिका रहेको छ । फिल्ममा कला राई, रमा लिम्बु, इशक राई, सुनिल थापा, दमन रुपाखेती, सुरबिर पण्डित, रामचन्द्र अधिकारी, भुपेन्द्र लिङदेन, उदय सुब्बालगायतका कलाकारको अभिनय रहेको छ ।
फिल्मका गीतमा ताराप्रकाश लिम्बु र विकास चौधरीको संगीत रहेको छ भने कमल राई र दिनेश पाख्रिनको कोरियोग्राफि छ । फिल्ममा सहारा प्रधान, बिरु गुरुङ र केशबकुमार श्रेष्ठको संयुक्त लगानी छ । फिल्म नयाँवर्ष २०७६ को अवसरमा प्रर्दशनमा आउने छ ।
