काठमाडौ । नायक पल शाहको नायिका आँचल शर्मासँग अफेयरको खबरले समय समयमा मिडिया बजार तातिरहन्छ । आँचलसँग अफेयरमा नाम जोडिइरहँदा पलले चाहिँ अञ्चल–अञ्चलमा ससुराली बनाएका छन् । गायक खुमन अधिकारीको नयाँ गीत ‘१४ अञ्चल ससुराल’मा पलले अञ्चल अञ्चलमा ससुराल बनाएका हुन् । भिडियोमा उनले नायिका सारा सिरपालीसँग जोडी बाँधेका छन् ।
गायक खुमनले आफ्ना साबिकका गीत भन्दा फरक तरिकाले यस गीतलाई प्रस्तुत गरेका छन् । गीतमा अराज केशवले र्याप हानेका छन् । गीतमा शब्द तथा संगीत माधव न्यौपानेको छ ।
चलनचल्तीको गीत भन्दा केहि लामो लाग्ने गीतमा पल र सारासँगै अराज केशवले पनि नृत्य गरेका छन् । बिक्रम चौहानको निर्देशनमा बनेको भिडियोमा पछिल्लो समय चर्चामा रहेको अशिक र निरजको समलिंगी जोडी समेत रहेको छ भने गीतमा भनिएअनुसार नै विदेशी युवतीलाई पनि देख्न सकिन्छ । भिडियोलाई अर्जुन तिवारीले छायांकन गरेका हुन् भने सुप्रिम पराजुली भिडियो सम्पादक हुन् ।
