काठमाडौं । फिल्म ‘होस्टेल’ बाट अनमोल केसीलाई नायकका रुपमा ‘डेब्यू’ गराएका निर्माता सुनिल रावलले फिल्म ‘होस्टेल’को तेस्रो सिरिज ‘होस्टेल ब्याक अगेन’को निर्देशन गर्ने भएका छन् । उनको यो डेब्यू निर्देशन हुनेछ । फिल्म ‘होस्टेल’को दोस्रो सिरिज ‘होस्टेल रिर्टन्स’ पनि सुनिलले नै निर्माण गरेका हुन् ।
फिल्म ‘होस्टेल ब्याक अगेन’ दुर्गेस फिल्मस् र काफिया फिल्मस्को व्यानरमा निर्माण हुनेछ । फिल्मका निर्माता गोविन्द शाहीका अनुसार फिल्मको सम्पूर्ण छायांकन अमेरिकामा हुनेछ ।
नवनिर्देशक सुनिलका अनुसार हरेक देशबाट अमेरिका अध्ययनका लागी गएका र होस्टेलमा बसेका युवायुवतीहरुको विषयलाई फिल्ममा प्रस्तुत गरिनेछ । सुनिलकै कथा रहने फिल्ममा राय राइजको पटकथा, संवाद हुनेछ । फिल्मको हाल स्क्रिप्टको काम भइरहेको छ । अगस्टबाट छायांकन सुरु हुने फिल्मका लागि कलाकार चयन चाँडै सुरु हुनेछ ।
निर्माता शाहीका अनुसार केही कलाकार नेपालबाट अमेरिका छायांकनका लागि जानेछन् । बाँकी कलाकार अडिसनबाट अमेरिकामै चयन गरिने छ ।
