काठमाडौं । जापानमा बसेर बाँसुरी र तबलाको माध्यमबाट नेपाली गीत संगीतको प्रवद्र्धनमा सक्रिय चौतारी व्याण्डका बाँसुरीवादक पञ्च लामा, तबलावादक श्रवण लामा र जापानी कलाकार तेराकादो मित्सिगुले शुक्रबार आफ्ना लोक सांगीतिक धुनबाट दर्शकलाई मनोरञ्जन दिलाए । सांस्कृतिक संस्थानको आयोजनामा जमलस्थित नाचघरको प्रेक्षालयमा तीन कलाकारले विभिन्न नेपाली र जापानी धुनबाट दर्शकको मन जिते । नेपालका सुन्दर दृष्यहरु समेटिएको आफंैले तयार गरेको नेपाली लोक सांगीतिक वृत्तचित्र ‘सुन्दर नेपाल’को प्रदर्शनसँगै ‘चौतारी साँझ–२०७४’ सुरु भएको थियो । कार्यक्रमको पहिलो प्रस्तुतिमा पञ्च लामाले बाँसुरी मार्फत मनकामना धुन प्रस्तुत गरे । यसपछि पञ्च र श्रबणले बाँसुरी र तवलाको फ्युजन धुन प्रस्तुत गरे ।
अघिल्लो प्रस्तुतिमा प्रकाशको किरणलाई पछ्याउँदै पञ्च र श्रबणले बाँसुरी र तवलाको धुन ‘जर्नी थ्रो द लाईट’ शिर्षकमा प्रस्तुत गर्दा जापानी कलाकार तेराकादो मित्सिगुले गिटारमा साथ दिए । सोही क्रममा यी तीनले जापानी धुन ‘टोकियो नाईट धुन’ पनि प्रस्तुत गरे । यी दुई धुनसँगै उनले फ्युजन गरेर ‘द मेलानकोली नोट इन काठमाडौं’ शीर्षकमा प्रस्तुत गरिएको काठमाडौंका केही स्थानीय धुनहरूले कार्यक्रमको रौनक बढाएको थियो । यही क्रममा उनीहरुले एकान्छा शिर्षकमा नेपाली लोक धुन प्रस्तुत गरे ।
अघिल्लो चरणमा ‘सी वेभ’ शिर्षकमा बाद्यबादनबाट यी कलाकारले प्रस्तुत गरेको समुद्रको छाल धुन होस या ‘द हिमालयन’ शिर्षकका हिमाली क्षेत्रका लोक धुनहरु हुन् । यस्ता धुनमा कलाकार त्रयलाई दर्शकले तालीले निरन्तर साथ दिए । अझ उनीहरुको ड्रम सेसनको प्रस्तुत निकै उर्जायुक्त थियो । ड्रम सेसनअन्तर्गत ड्रमबाट श्रवण र बाँसुरीबाट पञ्चबीच युगल वादन प्रस्तुत भएको थियो ।
कार्यक्रमका अन्तिम चरणमा पञ्चले एकल बाँसुरी धुन प्रस्ूतुत गर्दा दर्शकले फेरी तालीले साथ दिए । ‘क्याराभान’ र ‘बनचरी’ शिर्षकका लोकधुनमा यी तीन कलाकारको प्रस्तुति बेजोड थियो । उनीहरुले मौलिक धुनअन्तर्गत मुरलीको माध्यमले विभिन्न चराको आवाज र गीत सुनाएर वनचरी भाका प्रस्तुत गरेका हुन् । ‘डान्सिङ बर्ड’ शिर्षकको धुन पनि त्यत्तिकै मिठयो थियो । ‘लाम्बादा’ शिर्षकमा साँगीतिक धुनसँगै यी तीनले चौतारी साँझ–२०७४ ट्युग्याए । पौने दुई घन्टाको यो कार्यक्रममा पञ्च, श्रवण र तेराकादोले १४ ओटा धुनहरू प्रस्तुत गरे ।
दुई दशकदेखि जापानमा बसेर त्यहाँका विभिन्न कार्यक्रममा नेपाली धुन पस्कँदै गरेका कलाकारद्वय पञ्च लामा र श्रवण लामाले काठमाडौंमा यो तेस्रो चौतारी साँझ हो । सर्लाहीको हरिवन नगरपालिका ५ स्थित चेतना सन्देश नेपालद्धारा सञ्चालिन द्धन्द्ध पीडित बाल गृहका लागि यो चौतारी साँझमा पञ्च र श्रबण लामाले १२ लाख रुपैयाँ सहयोग प्रदान गरे । आफुहरुले त्यो सँस्थालाई बिगतमा पनि यस्तै सहयोग प्रदान गर्दै आएको यी दुईले बताए । बिगतका वर्षमा जस्तै यस पटक पनि नेपाली र जापानीसँगीतलाई एकै थलोमा प्रस्तुत गर्न ‘चौतारी साँझ–२०७४’ आयोजना गरिएको संस्कृतिक संस्थानका महाप्रबन्धक राजेश थापाले कार्यक्रममा बताए ।
