काठमाडौं । आगामी कार्तिक ८ गते रिलिज हुने फिल्म ‘पोई पर्यो काले’को ट्रेलर सार्वजनिक भएको छ । ट्रेलरमा कमेडी, सस्पेन्स र इमोसनल दृश्य राखिएका छन् । शिशिर राणाको कथा तथा निर्देशन रहेको फिल्मको ट्रेलरमा कालो वर्णको केटा मन नपराउने एक युवतीको जीवनमा आइपर्ने घटनाक्रमलाई कमेडी शैलीमा प्रस्तुत गरिएको छ । ट्रेलरमा फिल्मकी प्रमुख नायिका पुजा शर्माले आफूलाई कालो भन्दा पनि हेन्डसम र गोरो पोई चाहिएको बताएकी छन् ।
फिल्ममा सौगात मल्ल, आकाश श्रेष्ठ, सोहित मानन्धर, शिशिर राणा, श्रृष्टि श्रेष्ठ, राजाराम पौडेललगायतका कलाकारको पनि अभिनय छ । तिहारको समयमा फिल्म हेरेर दर्शकले मनोरञ्जन लिने कुरामा यसको निर्माणपक्ष विश्वस्त देखिएको छ ।
रेड बर्ड प्रोडक्शनको ब्यानरमा निर्माण भएको फिल्मलाई किरण नेपालीले प्रस्तुत गरेका हुन् । फिल्ममा दिपक मनाङ्गे र सरोज नेपाली निर्माताको रुपमा छन् भने अमलादेवी राई कार्यकारी निर्माता छिन् ।
फिल्ममा लालबहादुर क्षेत्री र अर्जुन पोखरेलको संगीत, कमल राई र रामजी लामिछानेको कोरियोग्राफी, तारा थापाको सम्पादन, शिव ढकालको छायांकन छ ।
