काठमाडौं । आगामी कार्तिक २५ गते रिलिज हुने फिल्म ‘वेलकम टु हेम्जाकोट’ मा समावेश ‘मायाको रेडियो’ बोलको गीत सार्वजनिक भएको छ । सरोज पौडेलको लेखन र निर्देशनमा बनेको फिल्मको आइटम फ्लेभरको गीतमा विनोद न्यौपाने र अलिशा शर्मा फिचर्ड छन् । कविराज गहतराजले कोरियोग्राफी गरेको गीतमा उदेश श्रेष्ठ र इन्दिरा जोशीको स्वर, राज सागरको संगीत र प्रज्जवल अधिकारीको शब्द छ ।
बुधबार राजधानीमा आयोजित कार्यक्रममा संगीतकार सागरले सबैलाई मनपर्ने खालको गीत तयार गरेको बताए । गायक उदेशले फिल्म ‘लोफर’ पछि आफू यही फिल्मबाट पुनः पाश्र्व गायनमा प्रस्तुत भएको बताए । निर्देशक पौडेलले आफूले निकै मेहनत गरेर फिल्म निर्माण गरेकाले आमदर्शकको मन जित्नेमा ढुक्क रहेको बताए ।
चलचित्र निर्माता संघका अध्यक्ष आकाश अधिकारीको प्रमुख आथित्यतामा सम्पन्न कार्यक्रममा फिल्मका प्रमुख अभिनेता बिनोद न्यौपानेले ‘वेलकम टु हेम्जाकोट’ साँच्चै नै रमाइलो बनेको बताउदै दर्शकको माया पाउनेमा आशवादी रहेको सुनाए । फिल्मकी प्रमुख अभिनेत्री अम्बिका तामाङ, सुजैरा कार्की, अस्मिता पन्तलगायत विशाल पहाडी, शारदा गिरीले पनि आफूहरुको अभिनयलाई दर्शकले मन पराउने आशा ब्यक्त गरे ।
तेजप्रसाद दाहालको प्रस्तती, सुमन खड्का कार्यकारी निर्माता र जितेन्द्र गिरी निर्माता रहेको फिल्ममा बुद्धि तामाङ, शारदा गिरी, विशाल पहाडी, रवी गिरी, सन्दिप सिग्देल र स्व. जयनन्द लामाले पनि अभिनय गरेका छन् ।
प्रवीण राई, रिता परियार, रमेश चापागाँई, सुदीप पोखरेल, सुनील पोखरेल, महेश प्रसाईँ, आइतराम तामाङ, सशांक खड्का, गोपाल सानु र युवराज कट्वाल सह—निर्माता रहेको फिल्म दीर्घ गुरुङले खिचेका हुन् । आरआर फिल्मस्ले वितरण गर्ने फिल्म क्लोजअप सिने प्रोडक्सनको ब्यानरमा निर्माण भएको छ ।
