काठमाडौँ । सिंगापुरको इन्फानाइट स्टुडियोज्ले अस्कर कलेज (कलेज अफ फिल्म स्टडिज)का १५ विद्यार्थीलाई छात्रवृत्ति उपलब्ध गराएको छ । स्टुडियोको प्रतिनिधि सुयीमोले बिहीबार अस्कर कलेजमै आयोजित कार्यक्रममा सन् २०२३ मा छात्रवृत्ति पाउने १५ जना विद्यार्थीलाई रकम हस्तान्तरण गरेकी छिन् । कार्यक्रममा ५ जना विद्यार्थीले इन्फाइनाइट छात्रवृत्ति र १० जनाले इन्फानाइट बर्सरी अवार्ड प्राप्त गरेका थिए ।
इन्फानाइट स्टुडियोज्ले २०७३ सालदेखि अस्कर कलेजमा पढ्ने विद्यार्थीलाई छात्रवृत्ति उपलब्ध गराउँदै आएको छ । प्रतिनिधिको रुपमा नेपाल आएकी मोले कलेजले विद्यार्थीको वृत्ति विकासमा ठूलो योगदान पुर्याउने उल्लेख गरिन् ।
‘कलेजमै विद्यार्थीले सबै सीप सिक्ने भएकाले गर्दा फिल्मकलेज सिनेमा उद्योगका आधार हुन् । यही कारणले हामीले विद्यार्थीलाई छात्रवृत्ति दिने निर्णय गरेका हौँ । आगामी दिनमा हामी अरु क्षेत्रमा पनि सहकार्य गर्न इच्छुक छौँ,’मोले भनिन् । मोले बिहीबार नै कलेजमा विद्यार्थीले बनाएका ६ वटा सर्ट फिल्म पनि हेरेकी थिइन् । फिल्म हेरेपछि मोले विद्यार्थीसँग फिल्मका विषयमा अन्तरङ्ग छलफल गरेकी थिइन् ।
कलेजका प्रिन्सिपल रामराजा दाहालले इन्फानाइटले दिँदै आएको रकम कलेज र विद्यार्थीका लागि ठूलो महत्वको रहेको धारणा राखेका थिए । ‘छावृत्तिवापत विद्यार्थीले पाउने रकमको ठूलो अर्थ छ । योबाहेक हामी स्टुडियोसँग आगामी दिनमा अरु क्षेत्रमा पनि सहकार्य गर्न इच्छुक छौँ,’ उनको भनाइ थियो ।
स्टुडियोले कोभिड १९ को महामारीका कारण क्षति बेहोर्नुपरेका विद्यार्थीका लागि भनेर दुई साल अघिदेखि बुरसरी अवार्ड पनि वितरण गर्न थालेको थियो । स्डुडियोले तेस्रो साल पनि यो अवार्डलाई निरन्तरता दिने निर्णय गर्दै बिहीबार यो अवार्ड प्राप्त गर्ने १० जना विद्यार्थीलाई छात्रवृत्ति रकम हस्तान्तरण गरेको थियो ।
इन्फानाइट छात्रवृत्ति पाउने ५ जनाको तर्फबाट सजन भण्डारी तथा इन्फानाइट बर्सरी पाउने विद्यार्थीको तर्फबाट जेम्स ढकालले स्टुडियोलाई कृतज्ञता प्रकट गरेका थिए ।
