काठमाडौं । प्रदीप शाहीको निर्देशनमा बनेको फिल्म ‘अन्तिम संस्कार’ को ओएसटी गीत ‘अल्झिन्छ सम्झना बिर्सन्छु भने नि बिर्सन्न’ सार्वजनिक भएको छ । गीतमा स्वप्निल शर्माको शब्द, संगीत तथा स्वर रहेको छ । गीतको लिरिकल भिडियोमा फिल्मका केही दृश्यहरु पनि समाबेश गरिएको छ ।
असार ८ गते बाट प्रदर्शनमा आउने तयारीमा रहेको फिल्मको गीतमा समाबेश दृश्यहरुले दर्शकमा झनै कौतुहलता बढाएको छ । फिल्मको कथा अनुसार अभिनेता विजय लामाले फिल्ममा न्युड सिन समेत दिएका छन् ।
साई प्रोडक्सन नेपालको ब्यानरमा ह्याम्साएर एकाउन्टेनको सहकार्य रहेको फिल्ममा भाइराजा थापा, राजु कुमार गुरुङ, सुमन राई, उत्सव विष्ट, रबिन्द्र श्रेष्ठ कार्यकारी निर्माता रहेका छन् । विनोद सुवेदी क्षितिज निर्माता रहेको फिल्म सामाजिक एवं सांस्कृतिक कथावस्तुमा निर्माण भएको हो । ‘मर्डर मिस्ट्रि ’को कथालाई फिल्ममा समावेश गरिएको छ ।
नेपालमा विदेशी फिल्मको वितरण गर्दै आएको कम्पनी एप्पल इन्टरटेनमेन्टले यो फिल्मलाई देशव्यापी वितरण गर्नेछ । यो फिल्म सामाजिक तथा सांस्कृतिक कथावस्तुमा निर्माण भएको हो । एक हत्या घटनाको रहस्यको वरपर कथा बुनिएको छ ।
प्रदीप शाहीको निर्देशनमा बनेको पहिलो फिल्म ‘१९१५ लेजेन्ड अफ गोर्खाज’ अमेजन प्राइममा समेत रिलिज भइ सकेको छ । फिल्ममा विजय लामा,दीया पुन,रेश्मा घिमिरे, एवनराज उप्रेती,त्रिचु राई,विशाल पहारी, कृष्णभक्त महर्जन,श्याम राई,पासाङ्ग लामा,बिकाश अधिकारी,सरोज खालिङ्ग राइ,सस्मिता गिरी,दिग्गज खत्री,सरोज कुमाल,धर्मानन्द आचार्य लगाएतको अभिनय रहेको छ ।
बाबु श्रेष्ठको छायाँकन,रुपेश गुरुङको सम्पादन रहेको यस फिल्मको प्रोडक्सन डिजाईनर प्रेम खड्का हुन् ।
