काठमाडौँ। अभिनेता सरोज खनालको डेब्यू निर्देशनमा बनेको फिल्म ‘बगान’को टिजर सार्वजनिक भएको छ । यही असार २९ गते रिलिज हुने फिल्मको टिजरमा अभिनेत्री करिश्मा मानन्धरलाई एकल महिलाको रुपमा चित्रण गरिएको छ । टिजरमा करिश्मा सुखदुःखका कुरा देखाइएको छ ।
निर्देशक खनालले टिजरमा एकल महिलाका इच्छा, चाहना, उनलाई परिवारले गर्ने व्यवहारलाई प्रस्तुत गरिएको बताए । टिजरमा सरोज खनाल, करिश्मा मानन्धर, आकाश श्रेष्ठ, नवअभिनेत्री प्रमिला कार्कीसँगै नीर शाह, बसुन्धरा भुषाल र मिथिला शर्मा फिचर्ड छन् ।
फिल्ममा स्वप्न नीरवको कथा छ । नेपाली वेबसाइट डटकमको प्रस्तुती रहेको फिल्मका निर्माता सुरेश वाग्ले हुन् भने कार्यकारी निर्माता विनोद मानन्धर हुन् । फिल्ममा गौरीशंकर धुजुको डिओपी, उत्सव दाहाल र नारायण जिसीको छायांकन, अर्जुन जिसी, राजेश शाह र सन्देश शाहको सम्पादन, समिर मियाँको भि.एफ.एक्स. तथा रेनिश फागोको कलर करेक्शन रहेको छ । ब्याकराउन्ड स्कोर सुजिल कर्माचार्य र साउन्ड मिक्सिंग मुकेश शाहको रहेको छ ।
फिल्म नेपाल र अमेरिकासहित नेपालीको बसोबास रहने विभिन्न देशहरुमा फिल्म प्रदर्शन गर्ने योजनामा निर्माण टिम छ । फिल्मको वितरण रिच इन्टरटेन्मेन्ट र डिसिएनले काठमाडौँ उपत्यका र बाहिर एफडी कम्पनीले गर्दैछ ।
