काठमाडौं । फिल्म ‘बाः एक योद्धा’को टिजर सार्वजनिक भएको छ । ‘एउटा सानो संसार थियो हाम्रो, सब तहसनहस भयो’ भन्ने संवाद सँगै सुरु भएको टिजरको दृश्यमा फिल्मका मुख्य पात्र दिव्यदेव पन्त जुत्तादेखि टाउकोसम्म रगतै रगत लत्पतिएको अवस्थामा देखिएका छन् ।
दिव्यदेव जब आफ्नो घर अगाडि देखिन्छन्, उनको दिमागमा विगतका सम्पूर्ण दृश्यहरू एकपछि अर्को गर्दै पल्टिन्छन् । जसले उनको सुन्दर परिवार देखाउँछ । त्यसपछि देखिन्छ परिवारमा आएको विपत्ति । बाबालाई बोलाउँदै कुद्दै गरेकी छोरी र परिवारका अन्य सदस्य, गाउँले आत्तिँदै कुदेको दृश्यले परिवारमा घटेको ठूलो महाविपत्ति देखाउँछ ।
त्यही बीचमा आउने दृश्यमा डाइलग छ– आज बाउको मुख हेर्ने दिन । तर एउटा बाले आफ्नो छोराको मुख हेर्न पाएन । यही बेला दिव्यदेव एउटा गाडीमा कतै गइरहेको दृश्य देखिन्छ । अनि आमा छोरी झरना थापा र सुहाना थापा रोइरहेको दृश्य ।
टिजरले एउटा सुन्दर परिवार कसरी तहसनहस भइरहेको छ भन्ने देखाएको छ । तर, त्यसको कारण के हो भन्ने खुलाएको छैन । पूर्ण पारिवारिक कथा देखाउन सफल टिजरले परिवारको इमोस्नल कथा देखाएको छ । अचानक घट्ने घटनाले कसरी परिवार तहसनहस हुन्छ भन्ने यो सिनेमाले देखाउने प्रयास गर्ने टिजरले प्रस्ट गरेको छ ।
फिल्म भदौ १९ गते रिलिज हुँदैछ । नेपाली समाजमा परिवारमा सन्तानको भविष्यका लागि बुवाले गर्ने त्याग, संघर्ष र जीवनभर झेल्ने चुनौतीहरू फिल्मको मुख्य कथा रहेको बताइएको छ ।
फिल्ममा दिव्यदेव, झरना र सुहानासँगै माओत्से गुरुङ, अनिल बुढाथोकी सागर खनाल, शिशिर सिवाकोटी, सुप्रज्ञा शर्मा र शवि थापा मुख्य भूमिकामा छन् ।
हरि लम्सालको लेखन तथा निर्देशन रहेको फिल्म कुशे औंसी अर्थात् बुबाको मुख हेर्ने दिनको पूर्वसन्ध्यामा प्रदर्शनमा आउन लागेको हो । आर्टिस्टिक इन्टरटेनमेन्टको ब्यानरमा निर्माण भएको फिल्मको कथासँगै पटकथा पनि लम्साल आफैँले लेखेका छन् । फिल्मका निर्माता वसन्त लम्साल हुन् ।
