काठमाडौं । नायक सविन श्रेष्ठ फिल्ममा एक्सन लुक्समा बढी देखिन्छन् । तर उनी पछिल्लो पटक फिल्म ‘भाग सानी भाग’मा कमेडी अभिनयमा देखिए । यिनै सबिन आगामी जेठ १७ गतेबाट रिलिज हुने फिल्म ‘काउसो’मा पनि कमेडी भूमिकामा देखिँदैछन् । राजधानीमा शुक्रबार आयोजित पत्रकार सम्मेलनमा उनले फिल्ममा काम गर्दा रमाइलो लागेको बताए ।
‘मैले यसअघि कमेडी फिल्म ‘भाग सानी भाग’मा अभिनय गरेको थिएँ । त्यो फिल्ममा काम गर्दा निकै रमाइलो लागेको थियो’, सबिनले भने, ‘मलाई धेरैले एक्सन हिरो भन्छन् । तर काउसोमा कमेडी पनि छ । त्यसकारण यसमा काम गर्दा रमाइलो लाग्यो ।’
निर्देशक मदन घिमिरेले काठमाडौंमा बसेर रातारात धनी बन्ने सपना देख्ने युवाको कथालाई फिल्ममा देखाइने बताए । उनका अनुसार फिल्म गत वैशाख २० मा रिलिज हुने योजना बनाए पनि फिल्म ‘दाल भात तरकारी’का कारण सार्नु परेको थियो ।
निर्देशक घिमिरेले यसअघि ‘बुवा आमा’, ‘घर संसार’, ‘जीवनदाता’, ‘दोस्ती’, ‘माया नमार’ लगायत फिल्म निर्देशन गरेका छन् । फिल्ममा सबिन श्रेष्ठ, अर्जुन गुरुङ, रमेश बुढाथोकी, अनु पराजुली, रामचन्द्र अधिकारी, नविन चापागाईंलगायतका कलाकारको अभिनय छ । सिताराम तिमल्सिना निर्माता रहेको फिल्ममा राजेन्द्र बस्नेत प्रस्तुतकर्ता र भगवान खत्री कार्यकारी निर्माता छन् ।
