काठमाडौं । आशुसेन फिल्मस्को व्यानरमा निर्माणको चरणमा रहेको फिल्म ‘प्रेमगीत ३’को मोसन टिजर सार्वजनिक भएको छ । मोसन टिजरमा फिल्मका प्रमुख अभिनेता प्रदीप खड्कालाई आक्रामक लुक्समा प्रस्तुत गरिएको छ । घोडामा सवार प्रदीपको लुक्स हेर्दा उनी एक योद्धा चरित्रमा रहेको अनुमान लगाउन सकिन्छ । छेतेन गुरुङ र सन्तोष सेनको निर्देशनमा निर्माणमा हुन लागेको फिल्मले दुई सय वर्ष अघिको कथा भन्नेछ । फिल्मको छायांकन यही शुक्रबारबाट सुरु हुँदैछ ।
निर्देशक गुरुङ र मन्दीप गौतमको लेखन रहेको फिल्ममा क्रिष्टिना गुरुङ, शिव श्रेष्ठ, सुनिल थापा, सन्तोष सेन, माओत्से गुरुङ, मनिष राउत, पुस्कर कार्की, प्रेम पुरी, लक्ष्मी वर्देवा, अनुभव रेग्मी, योगिशा खत्री, सम्वृद्धि शाही ठकुरी, क्रिजन गौतम, जीवन बराल, जीवन भट्टराई, सुजल बस्नेतको पनि अभिनय हुनेछ ।
चैत २८ गते रिलिज हुने फिल्मका लागि एक विशाल सेट पनि निर्माण गरिएको छ । फिल्ममा कल्याण सिंह र एलिश कार्कीको संगीत, राजेश श्रेष्ठको डिओपी, हिमाल केसीको एक्सन, कविराज गहतराजको कोरियोग्राफी र बनिश शाह तथा भुपेन्द्र अधिकारीको सम्पादन रहनेछ ।
