काठमाडौं । अभिनेता प्रदीप खड्का र नवअभिनेत्री क्रिस्टिना गुरुङ फिचर्ड फिल्म ‘प्रेम गीत–३’ को पहिलो गीत ‘हात्ती ढुंगामा’ सार्वजनिक भएको छ । फिल्म आगामी चैत २८ मा रिलिज हुँदैछ ।
करिब दुई सय वर्ष पुरानो कथा देखाइने फिल्मको यो गीतमा दुई शताब्दी अघिको स्वरुप दिईएको छ । प्राचीन शैलीमा तयार पारिएको गीतमा कविराज गहतराजको कोरियोग्राफी छ । गीतमा अभिनेता सुनिल थापालाई झाक्रीको रुपमा प्रस्तुत गरिएको छ भने माओत्से गुरुङ पनि फिचर्ड छन् ।
सागर आले र मेलिना राईको स्वर रहेको गीत लोक फ्लेभरको छ । गीतमा लोकबाजाहरुको प्रयोगले गीत लोक रक शैलीको बनेको छ । हर्क साउदले लेखेको यो गीतमा कल्याण सिंहको संगीत छ । गीतमा राजेश श्रेष्ठको छायांकन छ । भिडियोलाई युट्युब च्यानल ओएसआर डिजिटलबाट रिलिज गरिएको हो । गीतको सम्पादन बनिश शाह र भूपेन्द्र अधिकारीले गरेका हुन् ।
छेतेन गुरुङ र सन्तोष सेनले निर्देशन गरेको फिल्ममा सन्तोष सेन निर्माता छन् । फिल्मका सहनिर्माता कुमार सान शाह हुन् । फिल्ममा प्रदीप खड्का, क्रिस्टिना गुरुङसँगै शिब श्रेष्ठ, सुनिल थापा, मनिष राउत, सन्तोष सेन, माओत्स गुरुङ, पुष्कर कार्की, प्रेम पुरी, अनुभव रेग्मी, योगिसा खत्री, लक्ष्मी बर्देवा, समृद्धी शाही ठकुरी, क्रिजन गौतम, जीवन बराल, जीवन भट्टराई, राज थापा, सुजल बस्नेतसहितको अभिनय छ ।
