काठमाडौं । डेढ दशक भन्दा लामो समय यता रक ब्यान्डको रुपमा परिचित अभया एण्ड द स्टिम इन्जिनको नयाँ गीत ‘छ मेरो अरु संसार’ सार्वजनिक भएको छ । ब्यान्डको युट्युब च्यानलमार्फत् गीतको भिडियो सार्वजनिक गरिएको हो ।
गीतमा व्याण्डकी गायिका अभया सुब्बाको स्वर, शब्द तथा संगीत र संगीत संयोजन छ । गीतमा गितारको जिम्मेवारी रिन्चेन पाल्जरले सम्हालेका छन् भने सोनम लामा भुटियाको बेस रहेको छ । साथै, पियानोमा निकेश कार्की रहेका छन् भने ड्रममा रिन्चेन पाल्जर र नबिन थापा मगर रहेका छन् । ब्याकिङ भोकलमा प्रशान्त गुरुङ र रिन्चेन पाल्जर रहेका छन् ।
वि.सं. २०६० सालमा सुरुवात भएको अभया एण्ड द स्टिम इन्जिन ब्यान्डले आफ्नो छुटै किसिमको संगीतले दर्शक तथा श्रोता माँझ लोकप्रिय छ । सार्वजनिक गीत आफ्नो लागि निकै महत्वपूर्ण रहेको अभयाले बताइन ।
’यो गीतको प्रत्येक नोट, गितार सोलोदेखि ओर्केस्ट्राको संयोजन सबैमा मैले उत्तिकै मिहिनेत गरेकी छु’, उनले भनिन्, ‘संगीत निर्देशन पहिलेदेखि नै गर्दै आएपनि अब यसमा थप काम गर्ने सोच बनाएकी छु ।’ सार्वजनिक गीतमा महिर मल्ल र सृष्टि कार्की फिचर्ड छन् । भिडियोमा अभयाको निर्देशन छ ।
