न्यूयोर्क(एजेन्सी) । अमेरिकाको उटाहमा बस्ने एक ६ महिना बालकको वाटर स्कीइङको भिडियो सामाजिक सन्जालमा भाइरल भइरहेको छ । इन्स्टाग्राममा बालकको आमाबाबुले अपलोड गर्दै आफ्नो छोराले सबैभन्दा कम उमेरमा स्कीइङको विश्व रेकर्ड राखेको दाबी गरेका छन् । यो विषयमा सामाजिक सन्जालमा बहस शुरु भएको छ ।
भिडियोमा बच्चा डुंगामा राखिएको सेफ्टी आइरन रडलाई दह्रो समातिरहेका छन् । बच्चाले लाइफ ज्याकेट पनि लगाएका छन् । अर्को डुंगामा बच्चाका पिता छन् । जसले बच्चालाई हेरिरहेका छन् ।
यो भिडियोका बारेमा सामाजिक सन्जालमा किसिम किसिमका प्रतिक्रिया आइरहेका छन् । केहीले वाटर स्कीइङ गर्नका लागि बच्चाको उमेर कम भएको बताइरहेका छन् भने केहीले बच्चालाई पूर्ण सुरक्षाका साथ नदीमा उतारेको लेखेका छन् ।
