मुम्बई(एजेन्सी) । अभिनेता शाहिद कपुर बलिउडका चकलेटी हिरोका रुपमा चिनिन्छन् । आफ्नो फिल्मसँगै उनको नाम विभिन्न अभिनेत्रीसँगको अफेयरसँग पनि जोडिएको छ । उनको नाम करीना कपूर, बिपासा बासु, नरगिस फाखरी, सानिया मिर्जा जस्ता ठूला नामसँग पनि जोडिएका छन् ।
फिल्म उद्योगमा प्रख्यात हुनु अघि शाहिदले अभिनेत्री ऋशिता भट्टसँग डेट गरेका थिए । एक गीत ‘आँखो मे तेरा ही चेहरा’मा यो जोडीलाई देख्न सकिन्छ । शाहिदको अन्य सम्बन्ध भन्दा पनि अभिनेत्री करीना कपूरसँगको प्रेम सम्बन्धले सर्वाधिक चर्चा पायो । फिल्म ‘फिदा’को सुटिङका समयमा दुईबीच कुराकानी भएको थियो । दुबैबीच ५ वर्षको प्रेम रह्यो र फिल्म ‘जब वि मेट’को सुटिङ पछि दुवै सदाका लागि अलग्गिए । दुवैबीच उनीहरुको सम्बन्ध यस्तो थियो कि शाहिदले आफ्नो विवाहको कुरा मिडिया भन्दा अघि करीनालाई नै बताएका थिए ।
फिल्म ‘विवाह’मा अमृता राव र शाहिदको जोडीलाई मननपराउने सायदै कोही नहोला । अमृतासँग शाहिदको कुनै समयमा नाम जोडिएको थियो । दुवैजना फिल्म ‘इश्क–विश्क’ पछि हट गसिप बने । तर दुवैले यो बारेमा खुलेर कुरा गरेनन् । अमृताले सबै कुरालाई गलत भन्दै शाहिद एक मिल्ने साथी मात्र भएको बताइन् । शाहिद र प्रियंका चोपडाका बीच फिल्म ‘कमीने’को सेटबाट सम्बन्ध शुरु भएको थियो । दुवैले आफूहरुको सम्बन्धका बारेमा सत्यता पनि भनेका थिए । एक समय प्रियंकाको घरमा इनकम ट्याक्स कर्मचारीले छापा मार्दा शादि प्रियंकाकै घरमा थिए ।
अभिनेत्री विपाशा बसुसँग शाहिदको जोडी फिल्म ‘शिखर’मा देखिएको थियो । यो फिल्मको सुटिङको समयमा एकअर्कासँग डेट गरिरहेको खबर आएको थियो । यो समयमा उनीहरु प्रायः सँगै देखिन्थे । शाहिदको फिल्म ‘फटा पोस्टर निकला हीरो’को एक गीत ‘धतिंग नाच’मा नरगिस फाखरीले आइटम नृत्य गरेकी थिइन् । यहीबाट दुईबीचको प्रेम अंकुराएको खबर बाहिर आयो । उनीहरु लिभ इन रिलेसनमा समेत रहेको चर्चा चलेको थियो ।
शाहिद र अभिनेत्री विद्या बालन फिल्म ‘किस्मत कनेक्शन’ मा सँगै देखिए । यो फिल्मको छायांकनका क्रममा उनीहरु नजिकिएको चर्चा थियो । तर शाहिदले विद्याको वजनको बारेमा कमेन्ट गरेपछि उनीहरुको सम्बन्ध टुटेको थियो । फिल्म ‘बदमाश कम्पनी’ को समयमा शाहिदको अभिनेत्री अनुष्का शर्मासँग नजिकपन बढ्यो । अभिनेता इमरान खानको फिल्म ‘मेरे ब्रदर की दुल्हनिया’को सक्सेस पार्टीमा दुबैले चुम्बन गरेको खबर पनि सार्वजनिक भएको थियो ।
शाहिदको चर्चा फिल्ममा मात्र होइन, खेलकुदमा पनि उत्तिकै थियो । उनको नाम भारतीय टेनिस स्टार सानिया मिर्जासँग पनि जोडियो । यद्यपि सानियाको पाकिस्तानी क्रिकेटर शोएब मलिकसँग विवाह भएपछि सबै कुरा शान्त भयो । अन्ततः शाहिदले मीरा राजपुतलाई जीवनसंगीनि बनाए । उनीहरुले सन् २०१५ को जुलाई ७ मा विवाह गरे । उनीहरुको एक छोरी मीशा र छोरा जैन छन् ।
