मुम्बई(एजेन्सी) । बलिउड अभिनेता प्रभास फिल्म उद्योगमा ‘बाहुबली’को नामले परिचित छन् । उनी दक्षिण भारतीयका प्रख्यात र व्यस्त अभिनेतामध्ये एक हुन् । उनको हातमा कैयौं ठूला बजेटका फिल्म छन् । उनी ‘आदिपुरुष’, ‘राधे श्याम’ र निर्देशक नाग आश्विनको साइन्स फिक्सन फिल्ममा काम गर्दैछन् । यी सबै फिल्मको बजेटलाई जोड्दा प्रभासको आउन लागेको फिल्म प्रोजेक्टको मूल्य हजार करोड बढी छ ।
प्रभास फिल्म ‘राधे श्याम’मा अभिनेत्री पूजा हेगडेसँग रोमान्स गर्दैछन् । यो एक पिरियड ड्रामा हो र यसमा रोमान्स उत्तिकै छ । फिल्मको बजेट २ सय ५० करोड भनिएको छ । हालैमात्र फिल्मको पोस्टर सार्वजनिक गरिएको छ । फिल्मका निर्देशक राधाकृष्ण कुमार हुन् ।
उनको दोस्रो र निकै ठूलो प्रोजेक्ट ‘आदिपुरुष’ हो । निर्देशक ओम राउतको यो फिल्म रामायणको महागाथामा आधारित रहेर बनाइँदैछ । फिल्ममा प्रभास राम र सैफ अली खान रावणको भूमिकामा देखिँदैछन् । फिल्मको बजेट ४ सय ५० करोड रुपैंयाँ छ । फिल्म सन् २०२२ को अगस्ट ११ मा रिलिज हुनेछ ।
प्रभास बलिउड अभिनेत्री दीपिका पादुकोणसँग पनि फिल्ममा देखिँदैछन् । निर्देशक नाग आश्विनको साइन्स फिक्सन फिल्मको नाम हालसम्म फाइनल भइसकेको छैन । यो बेनाम फिल्मको बजेट ३ सय करोड छ । तेलुगू यो फिल्ममा दीपिकाको डेब्यू अभिनय रहनेछ ।
तीन ठूला तीन प्रोजेक्टका अलावा प्रभास तेलुगू फिल्मकर्मी कोरतला शिवासँग पनि काम गर्ने कुराकानी गरिरहेका छन् । यो प्रोजेक्ट शुरु हुन दुई वर्ष समय लाग्नेछ । यसअघि प्रभासले शिवासँग तेलुगू एक्सन ड्रामा फिल्म ‘मिर्ची’मा काम गरेका थिए ।प्रभास हाल फिल्म ‘राधे श्याम’को सुटिङमा व्यस्त छन् । फिल्ममा उनले विक्रमादित्यको भूमिका निभाउदैछन् । फिल्ममा पूजा हेगडे संगीत शिक्षकको भूमिकामा छिन् । फिल्म हिन्दी, तमिल र मलयालम भाषामा रिलिज हुनेछ ।
