मुम्बई(एजेन्सी) । बलिउड स्टार रणवीर सिंहले हालैमात्र सामाजिक सन्जालमा पोस्ट गरेको एक तस्बिरले इन्टरनेटको दुनियाँमा धमाका नै गरेको छ । अभिनेता रणवीरले आफ्नो त्यो पोस्टमा दक्षिण भारतीय सुपरस्टार महेश बाबुसँग चाँडै नै अनस्क्रिन आउने तयारी भइरहेको खुलासा गरेका हुन् ।
तस्बिर एक सुटिङ सेटको हो । जहाँ महेश बाबू र रणवीर दुवै आफ्नो गेटअपमा देखिएका छन् । तस्बिर शेयर गर्दै रणवीरले महेशलाई ‘फाइनेस्ट जेन्टलमेन’ भनेका छन् । ‘एक राम्रो जेन्टलमेन, जोसँग मलाई काम गर्ने मौका मिल्यो । हाम्रो कुराकानी जहिल्यै पनि उत्साहपूर्ण हुन्छ । प्रेम र धेरै सम्मान आफ्नो ठूलो दाई महेशजीलाई’, उनले लेखेका छन् ।
महेशले पनि रणवीरलाई यो प्रेमको जवाफ दिएका छन् । ‘तपाईंसँग काम गर्दा राम्रो लाग्यो मेरो भाई रणवीर । भावना दुवैतर्फ एकै जस्तो थियो ।’ उनले लेखेका छन् । उनीहरु कुन प्रोजेक्टमा काम गरिरहेका छन् भन्ने कुराको खुलासा भएको छैन । तर यो एक विज्ञापन हुनसक्ने अनुमान गरिएको छ ।
