मुम्बई(एजेन्सी) । यशराज फिल्मस्को स्टाइलिश एक्सन फ्रेन्चाइजी ‘धुम’को चौथो संस्करणप्रति दर्शकको प्रतिक्षा लामो छ । ‘धुम ४’लाई लिएर सन् २०२० मा कैयौं ठूला खबर बाहिर आए । जसमा बलिउडका कुन कुन कलाकार यो फ्रेन्चाइजीको हिस्सा हुन्छन् भन्नेसम्म समाचार आए । तर फिल्मका निर्माताले कुनै पनि खबरलाई सही भन्न सकेनन् ।
समाचार अनुसार यसपटक फिल्म ‘धुम ४’मा पुरुष चोर नभई महिला चोर हुनेछ । यस अघिका संस्करणमा पुरुष चोरलाई प्राथमिकता दिइरहेको निर्माण पक्षले यसपटक महिला चोरलाई अगाडि सारेको हो । फिल्ममा अभिनेत्री दीपिका पादुकोण चोरको भूमिकामा देखिँदैछिन् । यो विषयमा दीपिका र ब्यानरबिच निकै लामो समयसम्म छलफल भइसकेको छ र दीपिका सुटिङ समयलाई आफ्नो क्यालेण्डरमा राख्ने तयारीमा जुटेकी छन् । फिल्मको सुटिङ यसै वर्षको अन्त्यमा हुनेछ ।
दीपिकाले आफ्नो लामो फिल्मी करियरमा कैयौं एक्सन फिल्ममा काम गरिन् । तर ‘धुम ४’को एक्सनले सबैलाई चकित पार्ने बुझिएको छ । यो फिल्ममा हलिउड शैलीको एक्सन दृश्यलाई देखाइनेछ ।
