काठमाडौं । फिल्म ‘हेल्लो जिन्दगी’ ले प्रचारप्रसारलाई तीव्र पारेको छ । चैत्र १८ गते प्रदर्शन हुने फिल्मले मंगलबार राजधानीमा एक कार्यक्रम गर्दै ‘अनौठो माया’ बोलको रोमान्टिक गीत सार्वजनिक गरेको छ ।
एड्रिन प्रधान र रजिना रिमालको स्वरमा रहेको गीतमा फिल्मका प्रमुख अभिनेता विक्रम डि जोशी र दीपिका प्रसाईं फिचर्ड छन् । निर्देशक बोहराकै शब्द र अमित श्रेष्ठको संगीत रहेको गीतको कोरियोग्राफी बलिउडका कोरियोग्राफर विष्णु देवाले गरेका हुन् ।
कार्यक्रममा निर्देशक बोहराले फिल्मका दुई अभिनेत्री प्रियंका कार्की र दीपिका प्रसाईंले प्रमोशनमा साथ नदिएकोमा चित्त दुखाए । ‘उहाँहरुले प्रमोशनमा साथ दिनु भएन,’ उनले भने, ‘हामीले पटकपटक सम्पर्क गर्दा समेत रेस्पोन्स गर्नुभएन । निर्देशक बोहराले नायिकाहरुले न्युनतम व्यावसायिक धर्म निर्वाह नगरे तापनि आफूहरु विचलीत नभएको,बरु आगामी दिनमा यसखालका गैरजिम्मेवार कलाकार लिनु अघि धेरै विचार गर्ने बताए ।
फिल्मकी कार्यकारी निर्मात्री सिर्जना जोशी महर्जनले ‘हेल्लो जिन्दगी’ सत्य घटनाहरुबाट प्रभावीत भइ निर्माण गरिएकाले दर्शकको मन जित्ने बिश्वास लिएको बताइन् । अभिनेता विक्रमले आफूहरुले गुणस्तरीय फिल्म निर्माणमा कुनै कन्जुस्याइँ नगरेको बताए । अभिनेता बिक्रम, निर्देशक बोहरा र नवअभिनेत्री विभिया फिल्मकै लागि प्रमोसनका लागि बेलायतबाट आएका थिए ।
कार्यक्रममा फिल्मकी सहनिर्मात्री तथा अभिनेत्री सबिता गुरुङले आफूहरुले यो फिल्म पूरा गर्न निकै संघर्ष गरेको स्मरण गर्दै सफलता प्राप्त हुनेमा ढुक्क रहेको बताइन् । नवअभिनेत्री विभियाले फिल्म निकै राम्रो बनेकाले आम दर्शकको रोजाइमा पर्ने धारणा ब्यक्त गरिन् । आइएनएस हल,गोंगबुमा आयोजित कार्यक्रममा फिल्ममा समाबेश लोकशैलीको ‘ओखरको दाना’ बोलको गीत पनि प्रदर्शन गरिएको थियो ।
बेलायत र काठमाडौमा खिचिएको फिल्ममा विक्रम र दीपिकाका साथमा प्रियंका कार्की, विल्सनविक्रम राई, विक्रान्त बस्नेत, एभरेष्ट सूर्य बोहरा, विभिया श्रेष्ठ, सबिता गुरुङ, सनमकुमार बैराग, जानकी पन्त, मनोज केसी, ध्रुव दत्त, कुमुद पन्तलगायतको अभिनय छ ।
